यशदाचे मुख्य प्रशिक्षक शिवाजी पवार यांचे अधिकारी-कर्मचाऱ्यांना मार्गदर्शन
सोलापूर : सेवा संकल्प अभियानाच्या अनुषंगाने सामान्य प्रशासन विभाग, जिल्हा परिषद, सोलापूर यांच्या वतीने ‘माहितीचा अधिकार दिन’ यशवंतराव चव्हाण सभागृह येथे आयोजित करण्यात आला. यावेळी माहितीचा अधिकार अधिनियमाच्या विविध तरतुदी व अर्ज हाताळण्याच्या प्रक्रियेबाबत अधिकारी-कर्मचाऱ्यांना मार्गदर्शन करण्यात आले.कार्यक्रमास जिल्हा परिषद अध्यक्ष दीपक वैद्य, उपाध्यक्ष तथा बांधकाम व अर्थ समिती सभापती इंद्रजीत पवार, मुख्य कार्यकारी अधिकारी कुशल जैन, अतिरिक्त मुख्य कार्यकारी अधिकारी संदीप कोहिनकर, उपमुख्य कार्यकारी अधिकारी सूर्यकांत भुजबळ यांच्यासह विविध विभागांचे विभागप्रमुख, अधिकारी व कर्मचारी उपस्थित होते.
कार्यक्रमाचे प्रमुख मार्गदर्शक यशदाचे मुख्य प्रशिक्षक शिवाजी पवार यांनी माहितीचा अधिकार अधिनियमांतर्गत अर्ज प्राप्त झाल्यानंतर करावयाची कार्यवाही, उपलब्ध माहितीचे स्वरूप, माहिती देताना घ्यावयाची दक्षता, कायदेशीर तरतुदी, प्रथम अपील तसेच पुढील प्रक्रियेबाबत सविस्तर माहिती दिली.
माहिती अधिकार कायद्याची योग्य माहिती व अभ्यास असणे आवश्यक असून, कायद्याच्या तरतुदीनुसार नागरिकांना स्पष्ट, वस्तुनिष्ठ व उपलब्ध माहिती देणे ही प्रशासनाची जबाबदारी आहे, असे शिवाजी पवार यांनी सांगितले. विविध उदाहरणांच्या माध्यमातून माहिती अधिकार अर्जांची हाताळणी व कायद्याची अंमलबजावणी याबाबत त्यांनी मार्गदर्शन केले.
जिल्हा परिषद अध्यक्ष दीपक वैद्य यांनी माहितीचा अधिकार हा लोकशाही व्यवस्थेतील महत्त्वाचा कायदा असल्याचे सांगितले. प्रशासनातील पारदर्शकता व उत्तरदायित्व वाढविण्यासाठी माहिती अधिकार कायद्याची प्रभावी अंमलबजावणी आवश्यक असल्याचे त्यांनी नमूद केले.
मुख्य कार्यकारी अधिकारी कुशल जैन यांनी माहिती अधिकाराच्या अर्जांकडे सकारात्मक व कायदेशीर दृष्टिकोनातून पाहण्याचे आवाहन केले. माहिती अधिकार अधिनियमातील तरतुदी समजून घेऊन नियमांच्या चौकटीत नागरिकांना आवश्यक माहिती सुलभ, स्पष्ट व वस्तुनिष्ठ पद्धतीने उपलब्ध करून द्यावी, असे त्यांनी सांगितले. प्रत्येक अधिकारी-कर्मचाऱ्याने आपल्या विभागाशी संबंधित माहिती अधिकाराच्या तरतुदींचा अभ्यास करावा, असेही त्यांनी नमूद केले.
कार्यक्रमास जिल्हा परिषदेच्या विविध विभागांतील अधिकारी व कर्मचारी उपस्थित होते. कार्यक्रमाचे सूत्रसंचालन सचिन जाधव यांनी केले. कार्यक्रमाच्या आयोजनासाठी सामान्य प्रशासन विभागाने प्रयत्न केले.
