डिजिटल रेशीम शाळेचे ११ वे ऑनलाइन सत्र २० नोव्हेंबर रोजी
सोलापूर : अनिश्चित पाऊस आणि दुष्काळी परिस्थितीच्या पार्श्वभूमीवर शेतकऱ्यांना पर्यायी उत्पन्नाचे साधन उपलब्ध करून देण्यासाठी रेशीम शेतीला प्रोत्साहन देण्यात येत आहे. याच अनुषंगाने जिल्हाधिकारी कार्यालयाचा एकात्मिक पर्यटन विकास प्रकल्प (ITDP) आणि जिल्हा रेशीम कार्यालय, सोलापूर यांच्या संयुक्त विद्यमाने ‘डिजिटल रेशीम शाळा’ हा उपक्रम राबविण्यात येत आहे. या उपक्रमांतर्गत शुक्रवार, २० नोव्हेंबर २०२६ रोजी सकाळी ११ वाजता ‘संगोपन गृह उभारणी व मांडणी’ या विषयावर ऑनलाइन मार्गदर्शन सत्र आयोजित करण्यात आले आहे.
तुती लागवड आणि रेशीम उत्पादन हा शेतीला पूरक व्यवसाय म्हणून विकसित करण्याच्या दृष्टीने हा उपक्रम महत्त्वपूर्ण आहे. इतर नगदी पिकांच्या तुलनेत तुती पिकाला कमी पाणी लागते. एकदा लागवड केल्यानंतर १५ ते २० वर्षांपर्यंत उत्पादन घेता येते. तसेच दर ३० ते ३५ दिवसांनी उत्पादन मिळत असल्याने शेतकऱ्यांना नियमित उत्पन्नाची संधी उपलब्ध होते.
‘डिजिटल रेशीम शाळे’च्या ११ व्या सत्रात रेशीम कीटक संगोपनासाठी आवश्यक असलेल्या संगोपन गृहाची उभारणी आणि मांडणी याबाबत सविस्तर मार्गदर्शन केले जाणार आहे. यामध्ये संगोपन गृहाचा आदर्श आकार, उपलब्ध जागेनुसार उभारणीचे पर्याय, बहुस्तरीय रॅकची रचना, गोणपाट व ठिबक सिंचनाद्वारे तापमान नियंत्रण, हवा खेळती ठेवण्याच्या उपाययोजना तसेच उझी माशी नियंत्रणासाठी मच्छरदाणी जाळी आणि पिवळ्या सापळ्यांचा वापर याबाबत माहिती देण्यात येणार आहे. याशिवाय ट्रे, चंद्रिका आणि निर्जंतुकीकरणासाठी आवश्यक साहित्याची माहितीही दिली जाणार आहे.
मनरेगा अंतर्गत संगोपन गृह उभारणीसाठी उपलब्ध १०० टक्के अनुदान, बांधकामाचे टप्पे, पाया, दोन फूट प्लिंथ व सांगाडा उभारणी, रेशीम संचालनालयाच्या ॲपवर छायाचित्रे अपलोड करण्याची प्रक्रिया तसेच ‘सिल्क समग्र-२’ योजनेची माहिती या सत्रात देण्यात येणार आहे. एक तासाच्या या मार्गदर्शन सत्राच्या शेवटी शेतकऱ्यांच्या शंकांचे निरसन करण्यासाठी प्रश्नोत्तरांचे आयोजन करण्यात आले आहे.
या उपक्रमासाठी प्रायमुव्ह संस्था तांत्रिक सहाय्य करीत आहे. जिल्ह्यातील रेशीम उत्पादक शेतकरी तसेच रेशीम शेती करण्यास इच्छुक असलेल्या शेतकऱ्यांनी शुक्रवार, २० नोव्हेंबर रोजी सकाळी ११ वाजता आयोजित ऑनलाइन मार्गदर्शन सत्रात सहभागी होऊन लाभ घ्यावा, असे आवाहन एकात्मिक पर्यटन विकास प्रकल्प आणि जिल्हा रेशीम कार्यालय, सोलापूर यांच्या वतीने करण्यात आले आहे.






