गेल्या काही महिन्यांपासून अन्न व औषध प्रशासनाने सुरू केलेल्या कारवाईमुळे हॉटेल चालकांचे चांगलेच धाबे दणाणले आहेत. मुंबई, पुण्यासह अनेक शहरातील मोठ मोठ्या आणि नामांकित हॉटेल्सवरती एफडीएने कारवाई केली आहे. सार्वजनिक आरोग्याच्या हितासाठी अन्न व औषध प्रशासनाने (FDA) पुणे विभागांतर्गत शिवाजीनगर, फर्ग्युसन कॉलेज (एफ. सी.) रोड येथील दोन प्रसिद्ध हॉटेलवर कठोर कारवाई केली आहे. तपासणीदरम्यान अन्न सुरक्षा व मानके कायद्याचे गंभीर उल्लंघन झाल्याचे निदर्शनास आल्याने मेसर्स हॉटेल वैशाली आणि मेसर्स रूपाली रेस्टॉरंट यांचे अन्न व्यवसाय परवाने तात्काळ प्रभावाने निलंबित करण्यात आले आहेत.
अन्न सुरक्षा अधिकारी अजिंक्य सुभाष उमाप यांनी दिनांक १३ नोव्हेंबर २०२६ रोजी मेसर्स हॉटेल वैशाली या आस्थापनेची सखोल तपासणी केली. या तपासणीत ९८ पैकी केवळ ५८ गुण प्राप्त झाल्याने आस्थापनेचा निकाल ‘Non-Compliance’ नोंदवला गेला.अत्यंत अपुरी जागा व स्वच्छतागृहांजवळ अन्नप्रक्रिया करण्यात येत होती. स्वयंपाकघरातील अपुऱ्या जागेमुळे कच्चा माल साठवण्याचे फ्रीजर महिलांच्या स्वच्छतागृहाच्या अगदी लगत, तर डोसा व उत्तप्पा तयार करण्याचा तवा पुरुषांच्या स्वच्छतागृहाच्या लगत ठेवण्यात आला होता. तसेच धुतलेली भांडी स्वच्छतागृहासमोरील टेबलावर ठेवलेली आढळली. तसेच यापूर्वी जून २०२६ मध्ये तपासणी करून सुधारणा नोटीस दिल्यानंतरही पुन्हा गंभीर त्रुटी आढळल्याने सहायक आयुक्त (अन्न) सय्यद इम्रान हाश्मी यांनी परवाना (क्र. ११५२४०३५०००३९५) तात्काळ निलंबित करण्याचे आदेश दिले.
