सोलापूर : मोची समाजातील नेते करण म्हेत्रे यांच्या अंत्यसंस्कारासाठी गर्दी जमविली व कोरोना प्रतिबंधक नियमांचे पालन न केल्याने सदर बझार पोलिस ठाण्यात गुन्हा दाखल करण्यात आला आहे.मयताचे सख्खे भाऊ बुगप्पा म्हेत्रे आणि दत्ता आसादे, जॉन फुलारी, बाबा करगुळे, डॉक्टर प्रसाद, करेप्पा जंगम आदी वीस जणांविरुद्ध तसेच इतर दीडशे ते दोनशे इसमांविरुद्ध रविवारी रात्री गुन्हा दाखल करण्यात आला. अलकुंटे चौक ते मोदी स्मशानभूमी या मार्गावरून अंत्ययात्रा काढताना मास्क चा वापर केला नाही, सामाजिक अंतर बाळगले नाही तसेच समाजाचा नेता गेला, कसला कोरोना , कुठला कोरोना असे म्हणत आरडाओरडा केला व उपस्थित अंमलदार व पोलिसांना धक्काबुक्की केल्याने तसेच शासकीय कामात अडथळा आणल्यामुळे हा गुन्हा दाखल करण्यात आला आहे. सदर बझार चे सहाय्यक पोलीस निरीक्षक सोळुंके अधिक तपास करीत आहेत.