बँक ऑफ इंडिया आरसेटीच्या प्रशिक्षणाने दिला आत्मविश्वास; 75 हजारांच्या स्वभांडवलातून उभारला व्यवसाय, आज दरमहा 40 हजारांचे उत्पन्न
हातात कात्री… समोर ग्राहक… आणि मनात एकच विचार—आपल्या हातातील कौशल्याला व्यवसायाची जोड देऊन स्वतःच्या पायावर उभे राहायचे! मोहोळ तालुक्यातील औंढी या छोट्याशा गावातील अभिमन्यू दिलीप चव्हाण यांच्या आयुष्याची कहाणी अशीच आहे. परिस्थिती प्रतिकूल होती, आर्थिक अडचणी होत्या; मात्र मनात स्वतःचा व्यवसाय उभा करण्याची जिद्द होती. या जिद्दीला योग्य प्रशिक्षणाची जोड मिळाली आणि एका छोट्याशा गावातील तरुण आज यशस्वी सलून व्यावसायिक म्हणून उभा आहे.
अभिमन्यू चव्हाण यांचे वय अवघे 33 वर्षे. कुटुंबाची आर्थिक परिस्थिती बेताची. रोज मिळणाऱ्या कामावर कुटुंबाचा उदरनिर्वाह चालायचा. दुसऱ्यांकडे काम करून मिळणाऱ्या उत्पन्नाला मर्यादा होत्या. त्यामुळे ‘आपले काहीतरी स्वतःचे असावे’ हा विचार त्यांच्या मनात सतत घोळत होता. मात्र, व्यवसाय सुरू करायचा तर कौशल्य, भांडवल आणि योग्य मार्गदर्शनाची गरज होती.
याच शोधात त्यांना बीओआय स्टार आरसेटी, सोलापूरची वाट सापडली.
प्रशिक्षणाने बदलला आत्मविश्वास
17 जुलै 2024 ते 15 ऑगस्ट 2024 या कालावधीत त्यांनी आरसेटीमध्ये ‘मेन्स पार्लर आणि सलून उद्यमी’ या विषयाचे प्रशिक्षण घेतले. प्रशिक्षणाच्या सुरुवातीला मनात काहीशी धाकधूक होती. या क्षेत्रात आपण यशस्वी होऊ का? ग्राहक आपल्यावर विश्वास ठेवतील का? व्यवसाय चालेल का? असे अनेक प्रश्न होते. मात्र, प्रशिक्षण जसजसे पुढे गेले तसतसा आत्मविश्वास वाढत गेला. केस कापण्याच्या विविध पद्धती, ग्राहकांच्या गरजा समजून घेणे, ग्राहकांशी संवाद साधणे, स्वच्छता व ग्राहक सेवा, व्यवसायाचे नियोजन आणि व्यवस्थापन अशा विविध बाबींचे शास्त्रशुद्ध प्रशिक्षण मिळाले.
कौशल्याला प्रशिक्षणाची आणि प्रशिक्षणाला आत्मविश्वासाची जोड मिळाली. हाच अभिमन्यू यांच्या आयुष्यातील टर्निंग पॉइंट ठरला. ‘नोकरी नको, स्वतःचा व्यवसाय हवा!’ प्रशिक्षण पूर्ण झाल्यानंतर त्यांनी मागे वळून पाहिले नाही. स्वतःच्या बचतीतून 75 हजार रुपये उभे केले आणि 13 मे 2025 रोजी स्वतःचे सलून सुरू केले.
सुरुवातीला ग्राहक कमी होते. मात्र, प्रत्येक ग्राहकाला चांगली सेवा देण्याचा त्यांनी निर्धार केला. कौशल्यपूर्ण काम, स्वच्छता, नम्र वागणूक आणि ग्राहकांचे समाधान यामुळे हळूहळू ग्राहकांची संख्या वाढू लागली. ग्राहकांच्या माध्यमातूनच त्यांच्या व्यवसायाची ओळख परिसरात पोहोचली.
आज काही महिन्यांच्या सातत्यपूर्ण प्रयत्नांनंतर अभिमन्यू यांच्या व्यवसायाने चांगली उभारी घेतली आहे. त्यांना दरमहा सुमारे ४० हजार रुपये उत्पन्न मिळत आहे. एवढेच नव्हे तर स्वतःपुरता रोजगार निर्माण न करता त्यांनी एका युवकाला रोजगाराची संधी उपलब्ध करून दिली आहे.
‘आरसेटीने मला फक्त व्यवसाय नाही, आत्मविश्वास दिला’
आपल्या यशाबद्दल बोलताना अभिमन्यू चव्हाण यांच्या चेहऱ्यावर समाधान दिसते. “बँक ऑफ इंडिया आरसेटीने ग्रामीण भागातील आमच्यासारख्या तरुणांसाठी खूप मोठी संधी उपलब्ध करून दिली. येथे मिळणारे प्रशिक्षण केवळ व्यवसाय शिकवत नाही, तर स्वतःच्या पायावर उभे राहण्याचा आत्मविश्वास देते. या प्रशिक्षणामुळेच माझ्या आयुष्याला नवी दिशा मिळाली,” असे ते कृतज्ञतेने सांगतात. आता स्वप्न मोठे आहे… 75 हजार रुपयांच्या स्वभांडवलातून सुरू झालेला हा व्यवसाय आता अभिमन्यू यांच्या मोठ्या स्वप्नांचा आधार बनला आहे. सलूनचा विस्तार करून ग्राहकांसाठी आधुनिक सुविधा उपलब्ध करून देण्याचे त्यांचे स्वप्न आहे.
एका छोट्याशा गावातून सुरू झालेली ही वाटचाल केवळ एका तरुणाच्या आर्थिक उन्नतीची कहाणी नाही; ती जिद्द, कौशल्य, प्रशिक्षण आणि आत्मविश्वास यांच्या संगमातून घडलेल्या परिवर्तनाची कथा आहे. ‘परिस्थिती बदलण्याची वाट पाहत बसण्यापेक्षा परिस्थिती बदलण्यासाठी स्वतः एक पाऊल पुढे टाकायचे’—अभिमन्यू चव्हाण यांची ही कहाणी ग्रामीण भागातील अनेक तरुणांना स्वतःचा व्यवसाय सुरू करण्याची प्रेरणा देणारी ठरते.
अभिमन्यूंच्या यशाची आकडेवारी
प्रशिक्षण : मेन्स पार्लर आणि सलून उद्यमी
प्रशिक्षण संस्था : बीओआय स्टार आरसेटी, सोलापूर
प्रायोजक बँक : बँक ऑफ इंडिया
प्रशिक्षण कालावधी : 17 जुलै 2024 ते 15 ऑगस्ट 2024
व्यवसाय सुरू : 13 मे 2025
स्व-गुंतवणूक : 75 हजार रुपये
सध्याचे मासिक उत्पन्न : सुमारे 40 हजार रुपये
निर्मित रोजगार : 1 युवक.
