मुंबई : काही दिवसांपूर्वी गुजरातमधील अहमदाबादच्या जीएसटी कमिशनरने संपन्न आणि अनेक दुर्मिळ वनस्पती-प्राण्यांचा अधिवास असलेले झाडाणी हे संपूर्ण गावच बळकावलं असल्याच्या चर्चा होत्या. गुजरातमधील अहमदाबादच्या जीएसटी कमिशनरनं एक, दोन एकर नाहीतर तब्बल 640 एकर जमीन खरेदी केल्याचा आरोप सामाजिक कार्यकर्ते सुशांत मोरे यांनी केलेला. विधानसभेत आज अधिकारी अनुपस्थित असल्याचा मुद्दा गाजला. या मुद्द्यावरुन सत्ताधारी आणि विरोधकांमध्ये आरोप-प्रत्यारोपांच्या फैरी झडल्याचंही पाहायला मिळालं. त्यावेळी बोलताना विरोधीपक्षनेते विजय वडेट्टीवार यांनी झाडाणीतील जमीनीचा मुद्दा काढत थेट प्रश्नच उपस्थित केला.
झाडाणी गावात गुजरातमधील अहमदाबादच्या जीएसटी कमिशनरनं जमीन खरेदी केल्याची बातमी काही दिवसांपूर्वी एबीपी माझावर प्रसिद्ध करण्यात आली होती. या अधिकाऱ्यानं खरेदी केलेली जमिन थोडी थोडकी नव्हे तर तब्बल 640 एकरांची होती. सध्या गुजरातमध्ये कार्यरत असलेले आणि मूळचे नंदुरबारचे असलेले भारतीय महसूल सेवेतील अधिकारी चंद्रकांत वळवी यांनी आणि त्यांच्या कुटुंबीयांनी या भागातील तब्बल 620 एकर जमीन खरेदी केल्याचा आरोप सामाजिक कार्यकर्ते सुशांत मोरे यांनी केलेला. याच मुद्द्यावरुन विधानसभेत बोलताना विजय वडेट्टीवार यांनी सत्ताधाऱ्यांवर निशाणा साधला. अधिकाऱ्यांच्या अनुपस्थितीवरुन सभागृहात पेटलेला मुद्दा थेट महाबळेश्वरमधीस झाडाणी गावातील जमिनीपर्यंत जाऊन पोहोचला.