सोलापूर महापालिकेत पदाधिकारी आणि अधिकारी नसल्यामुळे बहुतांश कार्यालय ओस पडलेली दिसतात. सध्या पदवीधर आणि शिक्षक मतदार संघातील निवडणुकीची आचारसंहिता असली हे जरी कारण असले तरीही आचार संहिता नसताना देखील महापालिकेतील वातावरण फारसे चांगले राहिलेले नाही. ठराविक अधिकारी कार्यालयीन वेळेत महापालिकेत भेटतात. नाहीतर बहुतांश अधिकारी बाहेरून आपल्या मर्जीप्रमाणे कामे करतात. खाते प्रमुखच कार्यालयीन वेळेत सापडत नसल्यामुळे त्यांचा स्टाफ बिनधास्त आहे. महापालिकेतील सामान्य प्रशासन विभागातील उपायुक्त,सहाय्यक आयुक्त या गंभीर बाबीकडे लक्ष देत नाहीत. त्यामुळे अधिकारी भेटत नाहीत… साईट विजिटला गेले आहेत… निवडणुकीच्या कामासाठी गेले आहेत… असली उत्तरे ऐकायला मिळतात.
यापूर्वीचे महापालिकेतील पदाधिकारी देखील सकाळ आणि संध्याकाळ नागरिकांची कामे मार्गी लावत असत. मात्र ठराव पदाधिकारी आणि नगरसेवक सोडले तर त्यांचा देखील महापालिकेत येण्याचा इंटरेस्ट कमी झाला आहे. ज्या उद्देशाने महापालिकेत भाजपचे 87 नगरसेवक निवडून आले आहेत त्यांचा उद्देश सफल होताना दिसत नाही त्यामुळे बऱ्याच नगरसेवकांनी महापालिकेकडे पाठ फिरवली आहे. कामेच होत नसल्यामुळे अनेक नगरसेवकांना पश्चाताप होत आहे. ठराविक नगरसेवक आणि पदाधिकारी अधिकाऱ्यांचा ताना काढून कामे करतात मात्र बाकीच्यांची डाळ काही शिजत नसल्यामुळे महापालिका कारभाऱ्याचे धिंडवडे निघत आहेत. सोलापूर शहरातील आमदार तसेच महापालिकेतील पदाधिकाऱ्यांनी महापालिका प्रशासनाला शिस्त लावणे खूप गरजेचे आहे. नाहीतर सध्या महापालिकेतील कारभार म्हणजे आओ जाओ घर तुम्हारा असा दिसत आहे.
