पुणे येथे दिमाखदार सोहळ्यात सन्मान; सोलापूरच्या शिरपेचात मानाचा तुरा
पुणे- संगीत व गायन क्षेत्रात उल्लेखनीय योगदान देत आपल्या कलेच्या माध्यमातून रसिकांच्या मनावर वेगळी छाप निर्माण करणारे सोलापूरचे गायक दयानंद ढेकळे यांना त्यांच्या कलाक्षेत्रातील योगदानाबद्दल ‘राष्ट्रीय भारत गौरव पुरस्कार २०२६’ या प्रतिष्ठेच्या पुरस्काराने गौरविण्यात आले.
शाहू ज्योती सामाजिक संस्था, महाराष्ट्र राज्य व श्लोक फाउंडेशन, महाराष्ट्र राज्य यांच्या वतीने पुणे येथे आयोजित करण्यात आलेल्या भव्य पुरस्कार सोहळ्यात हा सन्मान प्रदान करण्यात आला.या सोहळ्यात भारतीय सैन्यदलातील सुभेदार महेंद्र गवई, तसेच राजमाता जिजाऊ माँसाहेबांच्या माहेरचे १४ वे वंशज संभाजीराजे जाधवराव यांच्या हस्ते दयानंद ढेकळे यांना पुरस्कार प्रदान करण्यात आला. सोहळ्याच्या अध्यक्षस्थानी मान्यवर प्राचार्य डॉ. शंकर आधानी, अध्यक्ष – साई इंडियन ट्रस्ट, नवी दिल्ली हे होते.
मान्यवरांच्या उपस्थितीत झालेल्या या पुरस्कार सोहळ्यात दयानंद ढेकळे यांचा सन्मानचिन्ह, गौरवपत्र व पुष्पगुच्छ देऊन गौरव करण्यात आला. पुरस्कार स्वीकारताना उपस्थित मान्यवर व रसिकांकडून त्यांचे अभिनंदन करण्यात आले.दयानंद ढेकळे हे गेल्या अनेक वर्षांपासून संगीत व गायन क्षेत्रात कार्यरत असून विविध सांस्कृतिक, सामाजिक आणि मनोरंजनात्मक कार्यक्रमांमध्ये आपल्या गायनाची कला सादर करत आहेत. ‘शिवरत्न मेलोडीज ऑर्केस्ट्रा, सोमणाथ नगर, सोलापूर’ यांच्या माध्यमातून त्यांनी संगीत क्षेत्रातील आपला प्रवास अधिक व्यापक केला आहे.
सोलापूरच्या मातीतून सुरू झालेला त्यांच्या संगीत प्रवासाला आता राष्ट्रीय स्तरावर गौरव प्राप्त झाला आहे. त्यामुळे हा पुरस्कार केवळ दयानंद ढेकळे यांचा वैयक्तिक सन्मान नसून सोलापूरच्या कला व संगीत क्षेत्रासाठीही अभिमानाचा क्षण ठरला आहे.पुरस्कार स्वीकारल्यानंतर दयानंद ढेकळे यांनी हा सन्मान आपल्या कुटुंबीयांसह, सहकलाकार, संगीतप्रेमी रसिक आणि आजपर्यंत प्रोत्साहन देणाऱ्या सर्व हितचिंतकांना समर्पित केला. “राष्ट्रीय स्तरावरील हा सन्मान माझ्यासाठी अत्यंत अभिमानाचा आणि अविस्मरणीय क्षण आहे. माझ्या गायनावर प्रेम करणाऱ्या रसिकांमुळेच मला आज या उंचीवर पोहोचता आले. हा पुरस्कार मला भविष्यात आणखी जोमाने संगीत क्षेत्रात काम करण्याची प्रेरणा देईल,” अशी भावना दयानंद ढेकळे यांनी व्यक्त केली.
या राष्ट्रीय सन्मानाबद्दल सोलापूरसह महाराष्ट्रातील विविध क्षेत्रातील मान्यवर, कलाकार, संगीतप्रेमी, मित्रपरिवार आणि रसिकांकडून दयानंद ढेकळे यांच्यावर अभिनंदनाचा वर्षाव होत आहे.
“सोलापूरच्या कलेचा राष्ट्रीय गौरव!”
दयानंद ढेकळे यांच्या संगीत प्रवासातील ‘राष्ट्रीय भारत गौरव पुरस्कार २०२६’ हा महत्त्वाचा आणि अभिमानास्पद टप्पा ठरला आहे.
