अख्खे सोलापूर शहर खोदले जाणार..! का आणि कधी…?

सोलापूर शहरात रस्ते करण्यासाठी कोट्यावधी रुपये खर्च करायचे आणि ते पुन्हा खोदायचे असा एक प्रकारे कार्यक्रमच सुरू आहे. त्यामुळे प्रत्येक रस्त्याची चाळण झाल्याची दिसते. धूळ मुक्त.. खड्डे मुक्त… अतिक्रमणमुक्त… दुतर्फा फुटपाठ असलेला… दुभाजक आणि त्यामध्ये झाडी फुललेला एकही रस्ता शहरात दिसत नाही. त्यामुळे राष्ट्रीय धूळ मुक्त अभियान असो…नगरोत्थान अभियान असो… की आमदार खासदारांचे रस्ते असोत… या रस्त्याची ड्रेनेज आणि पाणीपुरवठ्याच्या नावाखाली वाट लावली जाते. आता तर सोलापूर शहरात जागतिक बँकेच्या सहकार्याने चौदाशे कोटी रुपयांची पाणीपुरवठा योजना राबविली जाणार असून त्याची वर्क ऑर्डर आणखी सहा ते सात महिन्यात दिली जाईल. त्यानंतर प्रत्यक्ष कामाला सुरुवात होण्यासाठी पाच सहा महिन्यांचा कालावधी लागेल. शहरात सुमारे 1100 किलोमीटर लांब पाईपलाईनचे काम या योजनेत केले जाणार आहे. म्हणजेच पुढील वर्षभरात अख्खे शहर खोदले जाणार आहे. स्मार्ट सिटी योजनेतून केलेले सिमेंटचे शंभर कोटी रुपयांचे रस्ते, यांच्या मधून केलेले सुमारे 85 कोटींचे रस्ते, तसेच सध्या सुरू असलेला १६५ कोटी रुपयांचा होटगी रोड याशिवाय अनेक लोकप्रतिनिधींच्या निधीतून केलेले रस्ते पाणीपुरवठा योजनेसाठी खोदले जाणार आहेत.