दक्षिण तालुक्याची खरीप पिक कर्ज आढावा बैठक
सोलापूर – दक्षिण सोलापूर तालुक्यातील बँकांनी एक शाखा एक गाव पालकत्व घ्यावे. शेवटच्या शेतकऱ्यांना मदत करण्यासाठी प्रयत्न करा, बँकांनी दिलेले उद्दिष्टे पूर्ण करावे, शेतकऱ्यांची अडवणूक करू नका, बँका आणि शेतकरी यांचा समन्वय असावा, शेतकऱ्यांना गरज असेल त्यावेळी तात्काळ मदत करावी. शेतकरी स्वतःच्या पायावर उभे राहण्यासाठी बँकानी सहकार्य करावे अशा सूचना आमदार सुभाष देशमुख यांनी दक्षिण तालुक्यातील बँकेच्या सर्व अधिकाऱ्यांना दिल्या.
दक्षिण सोलापूर तालुक्याची खरीप पिक कर्ज आढावा बैठक बहुद्देशीय सभागृह जिल्हा परिषद येथे पार पडली. या बैठकीत आमदार सुभाष देशमुख बोलत होते. यावेळी सहाय्यक निबंधक दत्तात्रय मोरे, राम वारकडे लीड बँक मॅनेजर, कृषी विभागाचे प्रतिनिधी व तालुक्यातील सर्व बँक शाखाधिकारी उपस्थिती होते.
आ. देशमुख म्हणाले, नियमित कर्ज भरणा करणाऱ्या शेतकऱ्यांचा सन्मान करा व त्यांना प्रोत्साहन द्या. सर्व बँकानी शेतकरी मेळावे घेऊन जनजागृती करावी. बँकाच्या परिसरात ग्राहकांना सोईसुविधा द्या. शासनाच्या योजना आपल्या बँका मार्फत राबविल्या जातात त्याची अंमलबजावणी चांगल्या पद्धतीने करा, बँकांनी विकासाचा केंद्रबिंदू बनून काम करावे, एक गाव एक पद्धतसाठी बँकानी शेतकऱ्यांना सहकार्य करावे,
बचत गटांच्या महिलांना अर्थसहाय्य करावे व त्यांना उद्योजक करावे. त्यामुळे शेतकऱ्यांचा बँकेवर चा विश्वास वाढेल.
जिल्ह्यात पर्यटन सप्ताह साजरा करा
27 सप्टेंबर ते 2 ऑक्टोबर या कालावधीमध्ये सोलापूर जिल्ह्यात पर्यटन सप्ताह साजरा करा.
आपल्या शाखेला नागरिकांना भेटी देण्यासाठी आपल्या शाखेने वेगळेपण निर्माण करावे, आर्थिक साक्षरता होण्यासाठी प्रयत्न करावेत, अशा सूचनाही आमदार सुभाष देशमुख यांनी केल्या.
