राज्यातील सर्वात मोठ्या अंमली पदार्थ विरोधी गुन्ह्यातील दोन आरोपींना मुंबई येथील मे. उच्च न्यायालयाने दि. ०५ ऑक्टोबर २०२६ रोजीच्या आदेशान्वये जामीनावर मुक्त करण्याचा आदेश दिला आहे. संदीप यादव आणि देवेंद्र यादव (दोघे रा. दिल्ली) अशी त्यांची नावे आहेत.
दि. १९ फेब्रुवारी २०२४ रोजी क्राइम ब्रँच युनिट १, पुणेचे पोलिस निरीक्षक रमेश तापकीर आणि श्री शबीर सय्यद यांना सोमवार पेठ येथे संशयित आरोपी वैभव माने हा ५०० ग्रॅम Mephedrone / मेफेड्रॉन या अंमली पदार्थासह आढळुन आला. त्याचेकडे केलेल्या चौकशीत त्याने हे अंमली पदार्थ विश्रांतवाडी येथील हैदर शेख याचेकडुन आणल्याचे सांगितले. तेव्हा हैदर शेखकडुन पोलिसांना १२५० ग्रॅम M.D. ड्रग्ज मिळाले. तिन्ही आरोपीना अटक करून समर्थ पोलिस स्टेशन येथे NDPS Act sec.8(c), 22(C) आणि २९ अन्वये ३८/२०२४ हा गुन्हा नोंदविण्यात आला.
पुढील तपासात पोलिसांना माहिती मिळाली की दोन टेम्पो चालकांनी कुरकुंभ एम.आय.डी.सी., धानोरी, सांगली आणि दिल्लीला या ड्रग्जची वाहतुक केली आहे. त्यावेळी पोलीसांनी कुरकुंभ एम.आय.डी.सी. येथील एका केमिकल कंपनीवर छापा टाकुन ६६३ किलो M.D. जप्त केला. तसेच दिल्ली येथे जाऊन दिवेश भुटानी व संदीप बसोया या दोन आरोपींकडुन ३१९ किलोग्रॅम M.D. जप्त केले. दिल्ली येथील तपासात मिळालेल्या माहितीच्या आधारे पोलीसांना एका घरात ६३१ किलो M.D. सापडले. दिल्लीतील अटक केलेल्या आरोपीने पोलीसांना सांगितले की, ‘तो हे ड्रग्ज संदीप यादव याच्या कुरियर कंपनीमध्ये द्यायला निघाला होता व देवेंद्र यादव हा संदीप यादव यांच्या कुरियर कंपनीत मॅनेजर आहे. सदरचा माल लंडन स्थित आरोपी विरेंदर याच्या सांगण्यावरुन लंडनला पाठवणेसाठी संदीप यादव याचेकडे घेऊन जात होते.’ दरम्यान पोलीसांनी सांगली येथील एका गोडाऊनमधुन देखील १४८ किलो M.D. ड्रग्जचा साठा जप्त केला. त्यानंतर सदर गुन्ह्याची व्याप्ती वाढल्याने त्याचा तपास NCB (नार्कोटिक्स कंट्रोल ब्युरो) ने हाती घेतला. संपुर्ण कारवाईत एकुण १८३७.८४ कि.ग्रॅम मेफेड्रॉन जप्त करण्यात आले ज्याची त्यावेळची किंमत सुमारे ३००० कोटी रुपये असल्याचा पोलीसांचा अंदाज आहे.
पुणे सत्र न्यायालयाने जामीन नाकारल्यानंतर संदीप यादव व देवेंद्र यादव यांनी उच्च न्यायालयात धाव घेतली. “केवळ सह-आरोपींच्या जबाबाच्या आधारे या आरोपींना अटक केली आहे, आरोपींनी लंडनला ड्रग्ज पाठवल्याचा संपुर्ण दोषारोप पत्रात कोणताही पुरावा नाही, आरोपींना अटक करताना त्यांना अटकेची कारणे लेखी स्वरुपात दिली नाहीत, आरोपींविरुद्ध कारवाई करताना अंमली पदार्थ कायद्याचे कलम ४२ प्रमाणे पोलिसांना कायदेशीर प्रक्रियेचे पालन केलेले नाही” असा युक्तीवाद आरोपीचे वकिल अॅड. अतुल आर. पाटील यांनी केला. मे. उच्च न्यायालयाने आरोपींना जामीन देताना ‘आरोपींविरुद्ध दोषरोपपत्र दाखल करण्यासाठी पुणे येथील विशेष सत्र न्यायालयाने पोलिसांना दिलेली मुदतवाढ ही बेकायदेशीर व चुकीची असल्याचे नमुद करुन आरोपींना त्वरीत जामीनावर मुक्त करण्याचे’ आदेश दिले आहेत.
याकामी आरोपीचे वकिल अॅड. अतुल आर. पाटील यांना अॅड. तन्मय जाधव, अॅड. रमणजित सिंग, अॅड. अमोल शेळके, अॅड. ऋषिकेश गव्हाणे यांनी सहाय्य केले
