सोलापूर: ‘सेवा संकल्प अभियान’ अंतर्गत राज्य कामगार विमा योजना (ESIS), सेवा दवाखाना, चिंचोली येथे भव्य रक्तदान शिबिराचे आयोजन करण्यात आले होते. ‘रक्तदान हेच सर्वश्रेष्ठ दान’ या संदेशातून आयोजित करण्यात आलेल्या या सामाजिक उपक्रमाला कामगार विमाधारक व नागरिकांचा उत्स्फूर्त प्रतिसाद लाभला. या शिबिरात एकूण ९९ रक्तदात्यांनी रक्तदान करून सामाजिक बांधिलकी जपली.
शिबिराचे उद्घाटन सोलापूर औद्योगिक संघटनेचे उपाध्यक्ष सूत्रांवे यांच्या हस्ते दीपप्रज्वलन करून करण्यात आले. डॉ. निर्मलकुमार नेमाने, वैद्यकीय प्रशासन अधिकारी, तसेच डॉ. जयश्री जावडेकर, नोडल ऑफिसर यांच्या मार्गदर्शनाखाली या उपक्रमाचे आयोजन करण्यात आले.सिद्धेश्वर रक्तपेढीच्या सहकार्याने पार पडलेल्या या शिबिरात रक्तदात्यांनी मोठ्या संख्येने सहभाग नोंदवला. गरजू रुग्णांना वेळेवर रक्त उपलब्ध व्हावे आणि समाजात रक्तदानाविषयी जनजागृती व्हावी, हा या उपक्रमामागील प्रमुख उद्देश होता.
या शिबिराच्या यशस्वी आयोजनासाठी सांगली सेवा दवाखान्याचे प्रभारी वैद्यकीय अधिकारी डॉ. प्रशांत नाझरे यांचे मोलाचे मार्गदर्शन लाभले. सेवा दवाखाना, चिंचोली येथील सर्व अधिकारी व कर्मचाऱ्यांनी शिबिराच्या नियोजनासाठी विशेष मेहनत घेतली. सर्वांच्या एकत्रित प्रयत्नांमुळे शिबिर यशस्वीरीत्या पार पडले.
शिबिरात सहभागी झालेल्या सर्व रक्तदात्यांना प्रमाणपत्र देऊन सन्मानित करण्यात आले. रक्तदात्यांचे, सिद्धेश्वर रक्तपेढीच्या पथकाचे तसेच या उपक्रमासाठी सहकार्य करणाऱ्या सर्वांचे आभार मानून कार्यक्रमाची सांगता करण्यात आली.
