संत ज्ञानेश्वर महाराज यांच्या ७५० व्या जयंती वर्षानिमित्त २८ सप्टेंबर रोजी लोकसंस्कृती व सांस्कृतिक वैभवाचा सोहळा
संत ज्ञानेश्वर महाराज यांच्या ७५० व्या जयंती वर्षानिमित्त त्यांच्या ज्ञान, भक्ती आणि समतेच्या विचारांचा जागर करण्यासोबतच महाराष्ट्राच्या समृद्ध लोकसंस्कृती व सांस्कृतिक वैभवाचे दर्शन घडविण्यासाठी महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालय, महाराष्ट्र राज्य, मुंबई यांच्या वतीने ‘ज्ञानभक्ती स्त्रीशक्ती’ या विशेष सांस्कृतिक कार्यक्रमाचे आयोजन करण्यात आले आहे. सोमवार, दि. २८ सप्टेंबर २०२६ रोजी सायंकाळी ६.३० वाजता मुरारजी पेठ, जुनी पोलीस लाईन, सोलापूर येथील सुशील रसिक सभागृहात हा कार्यक्रम होणार आहे.
‘ज्ञानभक्ती स्त्रीशक्ती – लोकसंस्कृती आणि सांस्कृतिक वैभव सोहळा’ या संकल्पनेतून आयोजित या कार्यक्रमात संत ज्ञानेश्वर महाराजांच्या विचारांचा आणि भक्तिपरंपरेचा लोकसंस्कृतीशी असलेला अनुबंध विविध कलाविष्कारांच्या माध्यमातून उलगडण्यात येणार आहे. ज्ञान, भक्ती आणि स्त्रीशक्तीच्या विविध पैलूंना लोककला व सांस्कृतिक सादरीकरणाची जोड देत महाराष्ट्राच्या समृद्ध सांस्कृतिक परंपरेचे दर्शन या सोहळ्यातून घडणार आहे.
या कार्यक्रमात पंढरीनाथ कांबळे, विशाखा सुभेदार, अक्षता सावंत, जितेंद्र तुपे, कृष्णाई उळेकर, भूमिजा पाटील, जुई तनपुरे आणि शीतल पाटील हे कलावंत सहभागी होणार आहेत.
संत ज्ञानेश्वर महाराज यांच्या ७५० व्या जयंती वर्षानिमित्त राज्यभर विविध सांस्कृतिक उपक्रमांचे आयोजन करण्यात येत असून, संतपरंपरा, वारकरी संप्रदाय, भक्ती, ज्ञान आणि महाराष्ट्राच्या लोकसंस्कृतीतील समृद्ध वारसा नव्या पिढीपर्यंत पोहोचविण्याचा प्रयत्न या उपक्रमांच्या माध्यमातून करण्यात येत आहे.
हा सांस्कृतिक उपक्रम सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता मंत्री ॲड. आशिष शेलार यांच्या संकल्पनेतून तसेच सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली आयोजित करण्यात आला आहे. संत ज्ञानेश्वर महाराजांच्या विचारांचा आणि महाराष्ट्राच्या लोकपरंपरेचा सांस्कृतिक वारसा जतन, संवर्धन व प्रसार करण्यासाठी सांस्कृतिक कार्य संचालनालयामार्फत विविध उपक्रम राबविण्यात येत आहेत.
कार्यक्रमास प्रवेश विनामूल्य असून सोलापूर व परिसरातील रसिकांनी मोठ्या संख्येने उपस्थित राहून ‘ज्ञानभक्ती स्त्रीशक्ती’ या विशेष सांस्कृतिक सोहळ्याचा आनंद घ्यावा, असे आवाहन सांस्कृतिक कार्य संचालनालयाचे संचालक प्रशांत खेडेकर यांनी केले आहे.
या पत्रकार परिषदेस स्थायी समितीच्या सभापती रंजीता चाकोते, नगरसेविका अर्चना वडणाल आणि सुधा अल्लीमोरे उपस्थित होत्या.
