झेडपीचे मतदान सुरू, सोलापूर जिल्ह्यात भाजपचा कस लागणार, आमदारांची प्रतिष्ठा पणाला

सोलापूर जिल्हा परिषदेच्या 68 जागांसाठी 271 आणि पंचायत समितीच्या 136 गणांसाठी 485 उमेदवार निवडणुकीच्या रिंगणात आपले भवितव्य अजमावत असून यासाठी आज जिल्ह्यातील 2758 मतदान केंद्रांवर सकाळी साडेसात वाजल्यापासून मतदान सुरू झाले आहे.2017 साली झालेल्या निवडणुकीत 69 टक्के मतदान झाले होते. यंदा सोलापूर जिल्ह्यात 24 लाख 59 हजार 227 मतदार आहेत. त्यामुळे किती टक्के मतदान होणार याबाबत धाकधूक आहे. पालकमंत्री जयकुमार गोरे यांनी महापालिका निवडणुकीप्रमाणे जिल्ह्यात खूप मोठी ताकद लावली आहे. अनेक झेडपी गटामध्ये काट्यांच्या लढती आहेत. सोलापूर शहर मध्य आणि सोलापूर शहर उत्तर हे दोन विधानसभा मतदारसंघ वगळता जिल्ह्यातील 9 विधानसभा मतदार संघातील सर्वच आमदारांची आणि दोन खासदारांची प्रतिष्ठा या निवडणुकीमुळे पणाला लागली आहे. या निवडणुकीमध्ये आमदार सचिन कल्याणशेट्टी यांच्या पत्नी शांभवी, भाऊ सागर, माजी आमदार सिद्धाराम म्हेत्रे यांच्या कन्या शितल आणि मुलगा शिवराज, माजी आमदार दिलीप माने यांचे पुत्र पृथ्वीराज, माजी आमदार दीपक साळुंखे यांचे पुत्र यशराजे, माजी आमदार दिगंबर बागल यांच्या कन्या रश्मी बागल, माजी आमदार राम सातपुते यांच्या पत्नी संस्कृती , तसेच आमदार उत्तम जानकर यांचा मुलगा निवडणुकीत उभा आहे. उमेदवारी देताना आजी-माजी आमदारांनी घराणेशाहीची परंपरा जपली असून मतदार त्यांना कौल देणार का हे 9 फेब्रुवारी रोजी होणाऱ्या निकालात स्पष्ट होणार आहे.