दोन आमदार जिंकणार की पालकमंत्री आणि एक आमदार जिंकणार ?

उत्तर सोलापूर तालुक्यातील अपर तहसील कार्यालय वडाळा या ठिकाणी करावे की मार्डी या ठिकाणी करावे..याबाबतचा निर्णय शासन पातळीवर प्रलंबित आहे. वडाळा येथे मंजूर झालेल्या अपर तहसील कार्यालयाच्या विरोधात 5000 हरकती घेण्यात आल्या. याचा सोलापूर जिल्हाधिकारी कार्यालयाने सविस्तर अहवाल शासनाकडे पाठविला आहे. हे अपर कार्यालय म्हणजे भाजपचे आमदार सुभाष देशमुख यांच्या प्रतिष्ठेचा आणि त्यांचे पूर्वाश्रमीचे विश्वासू आणि आता राजकीय विरोधक असलेल्या शहाजी पवार तसेच झेडपीचे विद्यमान उपाध्यक्ष इंद्रजीत पवार यांच्या ताकतीचा विषय बनला आहे. अपर तहसील कार्यालय हे मार्डी या शहाजी पवार यांच्याच गावात राहिले पाहिजे असा आग्रह पालकमंत्री जयकुमार गोरे तसेच आमदार सचिन कल्याणशेट्टी यांचा आहे. तर हे अपर तहसील कार्यालय वडाळा या ठिकाणीच करावे यासाठी आमदार सुभाष देशमुख तसेच मोहोळचे राष्ट्रवादी शरद पवार गटाचे आमदार राजू खरे यांनी जोर लावला आहे. महसूल खात्याचे प्रधान सचिव विकास खारगे यांच्याकडे हा विषय प्रलंबित आहे. जिल्हाधिकारी एस कार्तिकेयन यांना दोन्ही गावचा सविस्तर अहवाल पाठवण्यात आला आहे. त्यामुळे आता मार्डी या ठिकाणीच अप्पर तहसील कार्यालय मंजूर करून घेऊन पालकमंत्री जयकुमार गोरे, आमदार सचिन कल्याणशेट्टी, झेडपीचे उपाध्यक्ष इंद्रजीत पवार, त्यांचे बंधू शहाजी पवार हे जिल्ह्यात आमचेच चालते हे दाखविण्याच्या तयारीत आहे. दुसरीकडे आमदार सुभाष देशमुख, आणि आमदार राजू खरे यांना काहीही करून हे अप्पर तहसील कार्यालय पवार यांचे गाव असलेल्या मार्डी मध्ये नको आहे. त्यामुळे या राजकीय लढाईमध्ये पालकमंत्री जयाभाऊ आणि आ.सचिन दादा जिंकणार की आमदार सुभाष बापू -आमदार खरे… या प्रश्नाचे उत्तर विधान परिषदेची आचारसंहिता संपल्यानंतर दिसणार आहे. गेल्या वर्षी मोहोळ तालुक्यातील अनगर अप्पर तहसील कार्यालय ज्याप्रमाणे गाजले त्याचप्रमाणे यावर्षी उत्तर सोलापूर तालुक्यातील वडाळा येथे मंजूर झालेले अपर तहसील कार्यालय गाजत आहे.