नाले घोटाळा : आयुक्तांकडून अभय, महापालिका कारभाराचे धिंडवडे…!

सोलापूर महापालिकेचे ज्यांनी करोडो रुपये नुकसान केले अशा अधिकाऱ्यांना अभय देण्याचे काम विद्यमान आयुक्त सचिन ओंबासे करीत आहेत. नालेसफाई घोटाळ्यात तत्कालीन नगर अभियंता सारिका अकलूवार यांचा पदभार काढून त्यांना परिवहन विभागाचे प्रमुख करण्यात आले. उर्वरित अधिकाऱ्यांवर काहीही ठोस कारवाई नाही. बीओटीची बांधकामे अर्धवट राहिली आहेत ज्यांच्याकडे ही जबाबदारी आहे त्यांच्यावर कोणतीच कारवाई नाही. वारकरी भवन, शुभराय आर्ट गॅलरी, कवीराय राम जोशी स्मारक, हुतात्मा किसन सारडा स्मारक , लिंगायत भवन, अशा बांधकामावर आजवर करोड रुपये खर्च झाले. ती कामे अर्धवट आहेत. आयुक्तांना अशा कामांकडे लक्ष द्यायला वेळ नाही. त्यामुळे महापालिकेचे कोट्यावधी रुपये नुकसान होत आहे. नाले घोटाळा पुराव्यासह उघड झाला. यामध्ये फौजदारी कारवाई होणे अपेक्षित असताना ती केली जात नाही त्यामुळे यामध्ये आयुक्त स्वतःच लाभार्थी आहेत की काय अशी शंका भाजप नगरसेवक अनंत जाधव यांनी उपस्थित केली. एकूणच महापालिका कारभाराचे धिंडवडे निघू लागले आहेत.