सोलापूर :
सोलापूर ग्रामीण पोलीस दलाच्या स्थानिक गुन्हे शाखेने घरफोडीच्या गुन्ह्यांमध्ये मोठे यश मिळवत तब्बल 10 घरफोडीच्या गुन्ह्यांचा उलगडा केला आहे. या कारवाईत पोलिसांनी 150 ग्रॅम सोन्याचे दागिने, 11 ग्रॅम चांदी, रोख रक्कम 12 हजार रुपये आणि एक दुचाकी असा एकूण 2 लाख 86 हजार 800 रुपयांचा मुद्देमाल जप्त केला आहे.
माळशिरस पोलीस ठाण्याच्या हद्दीत घरफोडीच्या वाढत्या घटनांच्या पार्श्वभूमीवर पोलीस अधीक्षक सोलापूर ग्रामीण यांच्या मार्गदर्शनाखाली स्थानिक गुन्हे शाखेचे पथक सक्रिय करण्यात आले होते. या पथकाने गुप्त माहितीच्या आधारे दीपक पवार (वय 25, रा. जडकारी वस्ती, माळशिरस) याला अटक केली.
तपासादरम्यान आरोपीने माळशिरस, वेकुर्डे व अकलूज पोलीस ठाण्यांच्या हद्दीतील एकूण 10 घरफोडीच्या गुन्ह्यांची कबुली दिली. आरोपीकडून चोरीस गेलेले सोन्याचे दागिने, रोख रक्कम तसेच गुन्ह्यात वापरलेली दुचाकी जप्त करण्यात आली आहे.
या गुन्ह्यांमध्ये भारतीय न्याय संहिता कलम 339(4), 305(3), 379(2), 34(4) आदी कलमान्वये गुन्हे दाखल असून पुढील तपास सुरू आहे.
ही कारवाई पोलीस अधीक्षक सोलापूर ग्रामीण, अपर पोलीस अधीक्षक, तसेच स्थानिक गुन्हे शाखेचे वरिष्ठ पोलीस निरीक्षक यांच्या मार्गदर्शनाखाली सहाय्यक पोलीस निरीक्षक व त्यांच्या पथकाने केली. या उल्लेखनीय कामगिरीबद्दल पोलीस पथकाचे सर्वत्र कौतुक होत आहे.
