तब्बल 73 दिवसानंतर उजनी धरणातील पाणी करण्यात आले बंद…!

उजनी धरणातून सोलापूर जिल्ह्यातील खरीप हंगामासाठी 15 जुलैपासून डाव्या कालव्यातून पाणी सोडण्यात येत होते. अखेर 73 दिवस हे पाणी सोडल्यानंतर आज पासून हे पाणी बंद करण्यात आले आहे. अद्याप सीना माढा आणि दहिगाव उपसा सिंचन योजनेचे पाणी सुरूच आहे. सध्या उजनी धरणात 81 टक्के म्हणजेच 107 टीएमसी एवढे पाणी शिल्लक आहे. दुष्काळाच्या पार्श्वभूमीवर हे संपूर्ण पाणी आता पिण्यासाठी राखीव ठेवण्यात आले आहे. गेल्या वर्षी आजच्या तारखेला उजनी धरणात 117 टीएमसी एवढे पाणी शिल्लक होते यंदाच्या वर्षी 10 टीएमसी पाणी संपले आहे. गेल्या वर्षी प्रचंड पाऊस झाला होता. ठिकठिकाणी अतिवृष्टी आणि पूर आल्यामुळे हजारो हेक्टर शेती पिकाचे नुकसान झाले तर यंदाच्या वर्षी मात्र त्याच्या उलटी परिस्थिती असून दुष्काळाची गडद छाया छाया जिल्ह्यावर पसरली आहे. दुष्काळाची पाहणी करण्यासाठी केंद्राची पथक येऊन गेले. जिल्हा महसूल प्रशासनाच्या वतीने बहुतांश नुकसानीचे पंचनामे पूर्ण झाले. आता शेतकऱ्यांना मदत कधी आणि किती मिळणार याची चिंता लागली आहे. अनेक ठिकाणच्या बोअर बंद पडले आहेत. विहिरीच्या पाण्याची पातळी झपाट्याने कमी होऊ लागली आहे. आणखी दीड दोन महिने कसेबसे निघतील. मात्र जानेवारी ते जून हे सहा महिने कसे काढायचे याची चिंता प्रत्येकालाच लागली आहे. याचा फटका सोलापूर शहर आणि जिल्ह्यातील व्यापारी पेठावर देखील आत्तापासूनच जाणवू लागला आहे. त्यामुळे यंदाचा दसरा आणि दिवाळी कशी जाईल याची चिंता व्यापाऱ्यांना देखील लागली आहे.