भारत रत्न इंदिरा गांधी अभियांत्रिकी महाविद्यालयातील विद्यार्थ्यांची नाविन्यपूर्ण प्रकल्प निर्मिती – महाविद्यालयाकडून विशेष सत्कार व पेटंटसाठी अर्ज

सोलापूर – भारतरत्न इंदिरा गांधी कॉलेज ऑफ इंजिनीयरिंग, सोलापूर येथील संगणक अभियांत्रिकी शाखेतील द्वितीय वर्षाचे विद्यार्थी कार्तिक
कोथलकर आणि सूरज मारू यांनी अत्यंत उपयुक्त व नाविन्यपूर्ण प्रकल्प तयार करून महाविद्यालयाच्या शैक्षणिक गुणवत्तेला नवा आयाम दिला आहे.

कार्तिक कोथलकर याने विकसित केलेली “SIDDHI AI” ही प्रगत कृत्रिम बुद्धिमत्ता प्रणाली कोणत्याही समस्येचे अचूक विश्लेषण करून योग्य समाधान सुचवते. ही प्रणाली उद्योग, वैद्यकीय, शिक्षण इत्यादी क्षेत्रात उपयुक्त ठरणारी आहे.

सूरज मारू याने तयार केलेला महिला सुरक्षा प्रकल्प महिलांना संकटाच्या वेळी तत्काळ मदत मिळवून देण्यासाठी विकसित करण्यात आला आहे. या प्रकल्पामुळे तंत्रज्ञानाच्या सहाय्याने महिलांची सुरक्षितता वाढवण्याची दिशा स्पष्ट झाली आहे.

या दोन्ही प्रकल्पांना समीर शेख आणि डॉ. सोहेल राणा यांचे तांत्रिक मार्गदर्शन लाभले, तर संगणक अभियांत्रिकी विभागाचे प्रमुख
आनंद ग्यानबोटे यांचेही मोलाचे योगदान लाभले आहे.

या विद्यार्थ्यांच्या उल्लेखनीय कार्याची दखल घेत *महाविद्यालयाचे प्राचार्य डॉ.अनिल देशमाने यांच्या हस्ते त्यांचा विशेष सत्कार करण्यात आला. तसेच या प्रकल्पांचे पेटंट अर्ज सादर करण्यात आले असून, भविष्यात हे प्रकल्प व्यावसायिक आणि सामाजिक उपयोगासाठी महत्त्वपूर्ण ठरणार आहेत.

या यशाबद्दल महाविद्यालयाचे चेअरमन इंजि. रविद्र गायकवाड सर आणि सेक्रेटरी अनामिका गायकवाड मॅडम यांनी विद्यार्थ्यांचे अभिनंदन करून त्यांना पुढील वाटचालीसाठी शुभेच्छा दिल्या. या प्रकल्पांमुळे महाविद्यालयाच्या नावात अभिमानास्पद भर पडली आहे.