साखर कारखानदारांकडून उसाला साडेतीन हजार रुपये पहिली उचल जाहीर करावी या मागणीसाठी आज स्वाभिमानी शेतकरी संघटनेच्या माध्यमातून जिल्हाधिकारी कार्यालयावर मोर्चा काढण्यात आला. माजी खासदार राजू शेट्टी यांच्या नेतृत्वाखाली हा मोर्चा निघाला आहे. तत्पूर्वी सकाळी 8:00 वाजल्यापासून चार पुतळा या ठिकाणी मोर्चाच्या पार्श्वभूमीवर भला मोठा पोलीस बंदोबस्त लावण्यात आला होता. सोलापूर जिल्ह्यातील साखर कारखाने सुरू होऊन एक महिना झाले तरीही कारखानदार ऊस दर जाहीर करत नाहीत त्यामुळे संतप्त शेतकरी आज मोठ्या प्रमाणावर मोर्चात सहभागी झाले. हा मोर्चा यशस्वी करण्यासाठी गावागावात घोंगडी बैठका देखील घेण्यात आल्या. त्यामुळे आजच्या मोर्चातून एफ आर पी चा दर जाहीर होतो का हे पाहणे महत्त्वाचे ठरणार आहे.
दुसरीकडे सायंकाळी चार वाजता कामगार नेते आडम मास्तर यांच्या नेतृत्वाखाली विडी कामगार विविध मागण्यांसाठी आज मुंबईकडे लॉन्ग मार्च काढणार आहेत. डॉक्टर बाबासाहेब आंबेडकर चौकात जाहीर सभा होऊन लॉंग मार्चला सुरुवात होणार आहे. विडी कामगारांना किमान वेतन द्यावे, पंतप्रधान आवास योजनेतून बांधलेल्या घरकुलांमध्ये मूलभूत सुविधा उपलब्ध करून द्याव्या आधी विविध मागण्यांसाठी हा लॉन्ग मार्च निघणार आहे. त्यामुळे राजू शेट्टी यांच्या शेतकरी आंदोलनाचा आणि अडम मास्तर यांच्या कामगार आंदोलनाचा एल्गार सोलापुरात दिसणार आहे.










