मराठा आंदोलक मनोज जरांगे यांची आज अंतरवाली सराटीत पत्रकार परिषद पाडली. यावेळी संतोष देशमुख हत्या प्रकरणावरून जरांगेंनी मोठा इशारा दिलाय. जरांगे म्हणाले की, उपोषणासंदर्भात आमच्या मागण्या सरकारला माहीत आहे. पावणे दोन वर्षांपासून आमचं हेच सुरू आहे, मराठा समाजाला सरसकट कुणबी आरक्षण द्या. गॅझेट लागू करा, शिंदे समितीचं काम सुरू करा, मराठा आंदोलकांवरील गुन्हे मागे घ्या.
आम्हाला संघर्ष करावा लागेल. समाज मला साथ देतो, समाज मला कधीही उघड्यावर पडू देत नाही. या आमरण उपोषणाला देखील मोठा प्रतिसाद मिळेल. आरक्षण सगळ्यांना हवं आहे. आम्ही नुसते आमदार मंत्री पक्ष यांना मोठे करणार नाही, मी समाजासाठी लढत आहे. स्वतःसाठी नाही. चंद्र, सूर्य असेपर्यंत मी लढतच राहणार. समाज मी कधीही सोडू शकत नाही, असं मनोज जरांगे म्हणालेत.
मुख्यमंत्री देवेंद्र फडणवीस आता लक्ष देतील. मराठ्यांशी ते बेईमानी करणार नाही. फडणवीस आम्हाला आरक्षण देणार. फडणवीस यांना मराठे मोठे व्हावे वाटतात की नाही, ते आता उघड होणार. मराठ्यांशी बेईमानी करणं त्यांना महागात पडणार, नाहीतर मग त्यांना दाखवतो. आता त्यांची ढकलाढकली बंद होणार. खरे जातीयवादी कोण हे आता उघड होणार, फडणवीस सगळ्या मागण्या पूर्ण करणार असल्याचा विश्वास जरांगेंनी व्यक्त केलाय.
समाजाची माझ्यावर माया आहे, म्हणून ते माझ्या उपोषणाला विरोध करत आहेत. पण मला समाजाची काळजी असल्यानं मी उपोषण करणार. कुणाचाही बाप आला तरी संतोष देशमुख हत्या प्रकरण दबू देणार नाही. सूर्यवंशी हत्या प्रकरणाच्या मागण्या घेणार, उद्या देशमुख यांच्या हत्येप्रकरणी मुंबईतील मोर्चात सर्वांनी सहभागी व्हावे, असं जरांगे यांनी आवाहन केलंय. आता सगळं क्लिअर होणार, शिंदे समिती नोंदी का शोधत नाही? व्हॅलेंडिटी का देत नाही? हे आता कळेल. मराठ्यांच्या विरोधात सरकार काम करत की नाही, तेही आता उपोषणादरम्यान समोर येणार असल्याचं मनोज जरांगे म्हणालेत.
