TOP 25 – सोलापूर विद्यापीठाने आचारसंहितेचे नियम बसविले ‘धाब्यावर’…!

सोलापूर स्थानिक स्वराज्य संस्था विधानसभा मतदारसंघाची आचारसंहिता सुरू असताना या आचारसंहितेचे नियम धाब्यावर सोलापूरच्या अहिल्यादेवी होळकर विद्यापीठाने धाब्यावर बसवले आहेत. उद्यापासून पाच जून पर्यंत सहयोगी प्राध्यापक आणि प्राध्यापक पदाच्या भरतीसाठी मुलाखत प्रक्रिया आयोजित केली आहे . तसे वेळापत्रक देखील प्रसिद्ध केले आहे. एकीकडे छत्रपती संभाजी नगरच्या डॉ बाबासाहेब आंबेडकर मराठावाडा विद्यापीठाने औरंगाबाद – जालना या स्थानिक स्वराज्य संस्था मतदारसंघातील निवडणुकीची आचारसंहिता सुरू झाल्यामुळे तातडीने विद्यापीठ व्यवस्थापन परिषदेची बैठक घेऊन प्राध्यापक भरतीच्या मुलाखती पुढे ढकलल्या. त्याबाबतची बातमी देखील दैनिक लोकमत मध्ये प्रसिद्ध झाली मात्र सोलापूर विद्यापीठाच्या व्यवस्थापनाने आचारसंहितेचे नियम गुंडाळत ठेवत मुलाखती सुरू ठेवल्या. सोलापूरचे जिल्हाधिकारी तथा स्थानिक स्वराज्य संस्था मतदार संघाचे निवडणूक प्रमुख कार्तिकेयन यांनी सर्व विभागांना आचारसंहितेचे काटेकोर पालन करा असे आदेश दिले असताना सोलापूर विद्यापीठाने याकडे दुर्लक्ष केल्याचे दिसते. त्यामुळे सोलापूर विद्यापीठाचे कुलगुरू आणि या भरती प्रक्रियेमधील संबंधित प्राध्यापक तसेच अधिकाऱ्यांवर आचारसंहिता भंगाचे जिल्हाधिकारी गुन्हे दाखल करणार का आणि ही भरती प्रक्रिया स्थगित करणार का याकडे लक्ष लागले आहे. यातून पुन्हा एकदा सोलापूर विद्यापीठाचा भोंगळ कारभार चव्हाट्यावर आला आहे.