सोलापूर महापालिकेने टँकर माफीयांना संपविले.. समांतर जलवाहिनीमुळे टेन्शन दूर

सोलापूर महापालिकेने गेल्या आठ ते दहा वर्षात हद्दवाढ भागात तसेच वाढलेल्या नगरांमध्ये सुमारे चारशे ते पाचशे किलोमीटरच्या जलवाहिन्या टाकल्या आहेत. यामुळे वितरण व्यवस्थेत समान पाणीपुरवठा करण्याचा दोष असला तरीही यामुळे प्रत्येकाला कमी- अधिक प्रमाणात पाणी मिळत आहे. प्रशासनाच्या या निर्णयामुळे पाणीपुरवठ्याचा टँकरवर होणारा कोट्यावधी रुपयाचा खर्च वाचला आहे. एकीकडे सोलापूर जिल्ह्यात दुष्काळामुळे 123 टँकरने पाणीपुरवठा सुरू ले असताना शहरात सध्या एकही पाणी टँकर नाही. उजनी ते सोलापूर ही स्मार्ट सिटी योजनेतून 860 कोटी रुपये खर्चून 170 एम एल डी पाणी वहन क्षमतेची जलवाहिनी टाकल्यामुळे शहराला दुष्काळाच्या कमी झळा सोसाव्या लागणार आहेत. या जलवाहिनीतून तसेच हिप्परगा येथून दररोज महापालिका 208 एमएलडी पाणी उचलत आहे. बारा लाख लोकसंख्या गृहीत प्रति माणसी 135 लिटर याप्रमाणे 162 एमएलडी पाणी यासाठी लागते. फ्लोटिंग लोकसंख्येसाठी तीन एमएलडी, व्यावसायिक वापरासाठी 17 एम एल डी, औद्योगिक वापरासाठी 27 एम एल डी असे 241 एम एल डी पाण्याची शहराला गरज आहे. यामध्ये 31 एम एल डी पाणी गळती वितरण व्यवस्थेतून होत आहे. सध्या शहराच्या 45 टक्के भागाला चार दिवसाआड तर उर्वरित पंचावन्न टक्के भागाला पाच दिवसात पाणीपुरवठा केला जातो. त्यामुळे उद्या म्हणजे 16 ऑक्टोबर पासून शासनाने दुष्काळाच्या पार्श्वभूमीवर सुचविलेली अतिरिक्त दहा टक्के पाणी कपात सोलापूर महापालिका करणार नाही अशी माहिती महापालिकेचे सार्वजनिक आरोग्य अभियंता व्यंकटेश चोबे यांनी दिली.