तडवळकरांचा आदेश; भाजप पदाधिकाऱ्यांना सकाळी उपस्थिती बंधनकारक..विशेष सभेपूर्वी सकाळी १० वाजता पक्षनेता कार्यालयात उपस्थित राहण्याचे रोहिणी तडवळकर यांचे आदेश
सोलापूर महानगरपालिकेतील महापौर व उपमहापौर पदासाठी शुक्रवार, दिनांक ६ फेब्रुवारी रोजी सकाळी ११ वाजता होणाऱ्या विशेष सभेच्या पार्श्वभूमीवर भारतीय जनता पार्टीकडून जोरदार तयारी सुरू करण्यात आली आहे.या अनुषंगाने भाजपाच्या नवनिर्वाचित ८७ नगरसेवकांची महत्त्वपूर्ण बैठक सारस्वत ब्राह्मण समाज मंगल कार्यालयात पार पडली. बैठकीस शहराध्यक्षा रोहिणी तडवळकर, गटनेते नरेंद्र काळे, महापौरपदाचे उमेदवार विनायक कोंड्याल, उपमहापौरपदाच्या उमेदवार ज्ञानेश्वरी देवकर यांच्यासह पक्षाचे प्रमुख पदाधिकारी उपस्थित होते.
बैठकीत गटनेते नरेंद्र काळे यांनी सभागृहातील कामकाजाबाबत महत्त्वाच्या सूचना दिल्या. यावेळी शहराध्यक्षा रोहिणी तडवळकर यांनी सर्व नगरसेवकांनी शुक्रवार सकाळी ठीक दहा वाजता महापालिकेतील पक्षनेता कार्यालयात अनिवार्यपणे उपस्थित राहण्याचे आदेश दिले. सभागृहात प्रवेश करण्यापूर्वी पक्षनेते सर्व नगरसेवकांना पुढील रणनितीची माहिती देतील, असे त्यांनी स्पष्ट केले.याच बैठकीत भाजपाच्या वतीने सर्व नगरसेवकांना व्हीपही बजावण्यात आला असून महापौर–उपमहापौर निवडणुकीत पक्षशिस्त पाळण्याचा ठाम निर्धार व्यक्त करण्यात आला.
