सोलापूर : पुण्यश्लोक अहिल्यादेवी होळकर सोलापूर विद्यापीठाच्या सामाजिक शास्त्रे संकुलातील आजी-माजी विद्यार्थी मेळावा, मार्गदर्शन संवाद आणि सुसंवाद विद्यार्थी संघटना यांच्या संयुक्त विद्यमाने ‘AI आणि माध्यमांची भूमिका’ या विषयावर विशेष कार्यक्रमाचे आयोजन शनिवार, ३ ऑक्टोबर २०२६ रोजी करण्यात आले आहे.कृत्रिम बुद्धिमत्ता (AI) या आधुनिक तंत्रज्ञानाचा शिक्षण, माध्यमे आणि दैनंदिन जीवनावर होत असलेला परिणाम, तसेच विद्यार्थ्यांसाठी निर्माण होणाऱ्या नव्या संधी याबाबत या कार्यक्रमातून मार्गदर्शन करण्यात येणार आहे. विद्यार्थ्यांना कृत्रिम बुद्धिमत्तेच्या बदलत्या स्वरूपाची माहिती मिळावी आणि या तंत्रज्ञानाचा शैक्षणिक तसेच व्यावसायिक क्षेत्रात प्रभावीपणे वापर करता यावा, हा कार्यक्रमाचा प्रमुख उद्देश आहे.
कार्यक्रमाच्या अध्यक्षस्थानी सामाजिक शास्त्रे संकुलाचे संचालक प्रा. डॉ. गौतम कांबळे राहणार आहेत. सावित्रीबाई फुले पुणे विद्यापीठ, पुणे येथील डॉ. योगेश बोराटे हे प्रमुख मार्गदर्शक म्हणून उपस्थित राहणार असून, माजी विभागप्रमुख डॉ. रवींद्र चिंचोलकर हे विशेष पाहुणे म्हणून उपस्थित राहतील. तसेच प्र. विभागप्रमुख डॉ. प्रभाकर कोळेकर यांच्यासह विद्यापीठातील विविध मान्यवरांची प्रमुख उपस्थिती राहणार आहे.
हा कार्यक्रम सामाजिक शास्त्रे संकुलातील सभागृहात सकाळी ११ ते सायंकाळी ४ वाजेपर्यंत होणार असून, प्रवेश विनामूल्य आहे.
सुसंवाद विद्यार्थी संघटनेचे अध्यक्ष सोमनाथ पवार, सचिव दशरथ कुंभार, सहसचिव आनंद बिराजदार, खजिनदार डॉ. येवसेप जगताप आणि प्रमुख संघटक डॉ. अंबादास भासके यांनी सर्व आजी-माजी विद्यार्थ्यांनी या स्नेहमेळाव्यास मोठ्या संख्येने उपस्थित राहावे, असे आवाहन केले आहे.
