सोलापूर : येत्या ३१ डिसेंबरच्या मध्यरात्रीपासून केंद्र सरकारच्या अंतर्गत येणारे सोलापूरचे ‘दूरदर्शन लघु प्रक्षेपण केंद्र’ बंद केले जाणार आहे. केंद्र शासनाच्या प्रसार भारती मंडळाने हा निर्णय घेतला आहे. सोलापूर जिल्ह्यातील अकलूज (चॅनेल क्रमांक ७), सोलापूर (चॅनल क्रमांक १२) आणि उस्मानाबाद जिल्ह्यातील उमरगा (चॅनल क्रमांक ५) ही केंद्रे ३१ डिसेंबर नंतर कायमची बंद होतील. यापूर्वी हे प्रक्षेपण केंद्र बंद करण्याची तारीख ३१ मार्च २०२२ होती. नंतर, ती बदलून ३१ डिसेंबर २०२१ करण्यात आली. प्रसार भारतीच्या मुख्य कार्यालयातून याबाबतची सूचना संबंधित लघु प्रक्षेपण केंद्रांना ई-मेलद्वारे पाठविण्यात आली आहे.
दूरदर्शन आरक्षण केंद्र सोलापूरचे सहाय्यक अभियांत्रिकी निरीक्षक एस.आर.देशपांडे यांनीही याला दुजोरा देताना सांगितले, प्रसार भारती बोर्डाने दूरदर्शन महानिर्देशक नवी दिल्ली यांच्या आदेशानुसारच ही दूरदर्शन लघुशक्ती केंद्रे बंद करण्यात येत आहेत. पंढरपूरचे केंद्र यापूर्वीच बंद करण्यात आले आहे. अकलूज, उमरगा आणि सोलापूर ही तीन केंद्र ३१ डिसेंबरनंतर बंद होतील. लघु प्रक्षेपण केंद्रे बंद होणार असले, तरी या चॅनलवरचे सर्व कार्यक्रम ‘दूरदर्शन डीडी फ्री डिश’ तसेच ‘डीटीएच’वर उपलब्ध असतील असेही त्यांनी स्पष्ट केले आहे. सेट टॉप बॉक्स, डिश अँटिना आणि इतर ॲक्सेसरीज स्थानिक बाजारपेठेत उपलब्ध आहेत. त्याच्या मदतीने लोकांना दूरदर्शनचे कार्यक्रम पाहता येतील.
