सोलापूर: टेक्स्टाईल सिटी म्हणून ओळखल्या जाणाऱ्या सोलापूरच्या वैभवात आणखी एक मानाचा तुरा रोवला गेला आहे. सोलापूरची कन्या वेदिका आनंद काबरा हिने राष्ट्रीय पातळीवर दैदिप्यमान यश संपादन करत सोलापूरचे नाव देशभरात उंचावले आहे. नवी दिल्ली येथे पार पडलेल्या राष्ट्रीय फॅशन तंत्रज्ञान संस्था (NIFT) च्या दीक्षांत सभारंभात वेदिकाला ‘बेस्ट स्टुडंट’ (सर्वोत्कृष्ट विद्यार्थिनी) म्हणून सुवर्णपदक (Gold Medal) बहाल करण्यात आले.
भारताच्या माननीय राष्ट्रपती द्रौपदी मुर्मू यांच्या प्रमुख उपस्थितीत झालेल्या या दिमाखदार सोहळ्यात, भारताचे माननीय वस्त्रोद्योग मंत्री गिरीराज सिंह यांच्या हस्ते वेदिकाला हे सुवर्णपदक प्रदान करण्यात आले.
देशातील सर्व २० NIFT कॅम्पसमध्ये अव्वल!
वेदिकाने २०२६ मध्ये NIFT, हैदराबाद येथून ‘फॅशन कम्युनिकेशन डिझाईन’ या अत्यंत लोकप्रिय शाखेतून ४ वर्षांची पदवी (Bachelors) पूर्ण केली. संपूर्ण भारतातील सर्व २० NIFT कॅम्पसमधून फॅशन कम्युनिकेशन शाखेत ‘सर्वोत्कृष्ट विद्यार्थिनी’ म्हणून तिची निवड झाली. सोलापूरसारख्या शहरातून डिझाईन सारख्या क्षेत्रात एका मुलीने थेट राष्ट्रपतींच्या उपस्थितीत देशात प्रथम क्रमांकाचे सुवर्णपदक पटकावण्याची ही सोलापूरच्या इतिहासातील दुर्मिळ घटना आहे.
IIT CEED मध्ये देशात दुसरा क्रमांक (AIR 2)
वेदिकाचे हे यश अपघाती नसून तिच्या सातत्यपूर्ण कष्टाचे फळ आहे. यापूर्वी तिने आयआयटीच्या IIT Master of Design प्रवेश परीक्षेत (CEE) संपूर्ण भारतात दुसरा क्रमांक (AIR 02) पटकावून सोलापूरकरांना थक्क केले होते. सध्या ती IIT मुंबई येथून ‘मास्टर ऑफ इंटरॲक्शन डिझाईन’ (M.Des) ही २ वर्षांची उच्च पदवी घेत आहे.
BRDS सोलापूरचे मार्गदर्शन लाभले
वेदिकाने तिच्या बॅचलर आणि मास्टर पदवीच्या दोन्ही प्रवेश परीक्षांची तयारी सोलापूरमधील BRDS (भंवर राठोड डिझाईन स्टुडिओ) येथून केली. तिने आपल्या यशाचे श्रेय BRDS सोलापूरचे सेंटर हेड धर्मेश टांक आणि तेथील तज्ज्ञ प्राध्यापकांच्या मार्गदर्शनाला दिले आहे.
वेदिकाच्या या अभूतपूर्व यशामुळे काबरा कुटुंबियांसह संपूर्ण सोलापूर जिल्हा अभिमानाने सुखावला आहे. तिच्या या यशाने डिझाईन क्षेत्रात करिअर करू इच्छिणाऱ्या सोलापूरच्या हजारो विद्यार्थ्यांसाठी एक नवा आदर्श आणि प्रेरणा निर्माण केली आहे. संपूर्ण सोलापूर शहरातून वेदिकावर कौतुकाचा आणि शुभेच्छांचा वर्षाव होत आहे.
