ग्रामीण भागातील नव उद्योजकांचे सक्षमीकरण होणार
सोलापूर – केंद्र शासनाच्या लघु, सूक्ष्म व मध्यम उद्योग मंत्रालयाकडून पुण्यश्लोक अहिल्यादेवी होळकर सोलापूर विद्यापीठास बिझनेस इनक्युबेशन सेंटर सुरू करण्याची मान्यता मिळाल्याची माहिती कुलगुरू डॉ. मृणालिनी फडणवीस यांनी दिली. या अंतर्गत ग्रामीण भागातील नव उद्योजकांचे सक्षमीकरण करण्यात येणार असल्याचे त्यांनी सांगितले.
पुण्यश्लोक अहिल्यादेवी होळकर सोलापूर विद्यापीठातील इनोव्हेशन, इनक्युबेशन अँड लिंकेज विभागाच्यावतीने गेल्या तीन वर्षांपासून उद्योजक पिढी घडण्यासाठी विविध उपक्रम राबवित जात आहेत. या विभागाच्या माध्यमातून केंद्र शासनाच्या लघु, सूक्ष्म व मध्यम उद्योग मंत्रालयाकडे बिझनेस इनक्युबेशन सेंटर सुरू करण्यासंदर्भात प्रस्ताव सादर करण्यात आला होता. त्याची सर्व प्रक्रिया होऊन विद्यापीठास बिझनेस इनक्युबेशन सेंटर सुरू करण्यास मान्यता मिळाली आहे. त्याअंतर्गत आता ग्रामीण भागातील युवकांमध्ये उद्यमशीलता निर्माण करण्यासाठी व उद्योजक पिढी घडविण्यासाठी विद्यापीठाला केंद्र शासनाच्यावतीने वेगवेगळ्या स्तरावर मदत केली जाणार आहे. त्या माध्यमातून विद्यापीठाला उद्योग क्षेत्रात काम करण्याची एक महत्त्वपूर्ण संधी लाभली आहे. ग्रामीण भागाच्या विकासासाठी विद्यापीठास हातभार लावण्याची संधी या माध्यमातून उपलब्ध झाल्याचे कुलगुरू डॉ. फडणवीस यांनी म्हटले आहे.
ग्रामीण भागातील लोकांचे वेगवेगळे नवीन विचार, कल्पना विचारात घेऊन नवीन उद्योग कसा सुरू करता येतो आणि त्याला विद्यापीठ व शासनाच्या माध्यमातून मदत करण्याचे काम या बिझनेस इनक्युबेशन सेंटरच्यावतीने करण्यात येणार असल्याचे इनोव्हेशन, इनक्युबेशन लिंकेज या विभागाचे संचालक डॉ. सचिन लड्डा यांनी सांगितले. सोलापूर जिल्ह्यातील युवकांना याचा फायदा होईल, असेही त्यांनी सांगितले.
बिझनेस सेंटरमुळे असा मिळणार निधी
पुण्यश्लोक अहिल्यादेवी होळकर सोलापूर विद्यापीठास बिझनेस इनक्युबेशन सेंटर सुरू करण्यास मान्यता मिळाल्यामुळे पायाभूत सुविधांसाठी एक कोटी रुपयांचा निधी मिळणार आहे. सीडमनीसाठी एक कोटी रुपयांचे अनुदान मिळणार आहे. त्याचबरोबर प्रत्येक नवीन आयडिया प्रकल्पसाठी 15 लाख रुपये मिळणार असल्याचे पुण्यश्लोक अहिल्यादेवी होळकर सोलापूर विद्यापीठाच्या कुलगुरू डॉ. मृणालिनी फडणवीस यांनी सांगितले.
