येस न्युज मराठी ओमिक्रॉनचा संसर्ग रोखण्यासाठी सरकारचे प्रयत्न सुरू असताना आता तामिळनाडूतून धक्कादायक बातमी समोर आली आहे. तामिळनाडूत ओमिक्रॉनचे एकाचवेळी ३३ रुग्ण आढळून आले आहेत.
तामिळनाडूमध्ये ओमिक्रॉनचा स्फोट झाला आहे. राज्यात Omicron चे ३३ नवीन रुग्ण आढळले आहेत. राज्याचे आरोग्य मंत्री एम. सुब्रमण्यम यांनी याबाबत माहिती दिली आहे. राज्यात ओमिक्रॉनच्या एकूण रुग्णाची संख्या ३४ झाली आहे. यापूर्वी केंद्राने सकाळी जाहीर केलेल्या यादीत तामिळनाडूनत फक्त १ रुग्ण असल्याचा उल्लेख केला होता. त्याचबरोबर देशातील ओमिक्रॉनचा वाढता धोका आणि करोनाच्या परिस्थितीबाबत पंतप्रधान मोदी थोड्याच वेळात आढावा बैठक घेणार आहेत.
गेल्या २४ तासांत चेन्नईत २६, सलेममध्ये १, मदुराईत ४ आणि तिरुवनमलाईमध्ये २ असे एकूण ३३ नवीन रुग्ण आढळून आले आहेत. यासह देशातील ओमिक्रॉनच्या एकूण रुग्णांची संख्या २८७ वर गेली आहे.
ओमिक्रॉनच्या या रुग्णांच्या संपर्कात आलेल्या नागरिकांचा शोध घेतला जात आहे. काहींचे नमुने जिनोम सिक्वेंसिंगसाठी पाठवण्यात आले आहेत. त्यांचे रिपोर्ट आलेले नाहीत. ओमिक्रॉनच्या रुग्णांची संख्या आणखी वाढण्याची शक्यता व्यक्त केली जात आहे. पण यामुळे नागरिकांनी घाबरू नये. करोनासंबंधी दिलेल्या सूचनांचे पालन करावे, असं आरोग्य विभागाचे प्रधान सचिव राधाकृष्णन यांनी सांगितलं.
