सोलापुरात आज सिद्धेश्वर यात्रेतील अक्षता सोहळ्यामुळे झालेली अभूतपूर्व अशी गर्दी तसेच निवडणुकीच्या निमित्ताने आज प्रचाराची सांगता करताना राजकीय पक्षांच्या उमेदवारांचे केले जाणारे शक्ती प्रदर्शन पाहता येणार आहे. सिद्धेश्वर यात्रेतील प्रमुख असा अक्षता सोहळा आज संमती कट्ट्यावर होणार असून हिरेहब्बू यांच्या यांच्या वाड्यातून हजारो भाविकांच्या उपस्थितीत सातही नंदी ध्वजाच्या मिरवणुका सिद्धेश्वर मंदिराकडे निघाले आहेत. लाखो भाविकांच्या उपस्थितीत आज दुपारी अक्षता सोहळा पार पडणार आहे तर त्यानंतर पुन्हा नंदीध्वज 68 लिंगांना प्रदक्षिणा करणार आहेत. त्याचबरोबर सोलापूर महापालिकेच्या निवडणुकीसाठी उभे असलेले 564 उमेदवार आज साडेपाच वाजता प्रचार संपणार म्हणून शक्ती प्रदर्शन करत एकमेकांसमोर दंड थोपटणार आहे. त्यामुळे सोलापूरकरांना एकीकडे हर बोला हर सिद्धेश्वर महाराज की जय.. असा जयघोष करताना धार्मिक भक्तीचे दर्शन होणार आहे. तर दुसरीकडे आज अखेरच्या होणाऱ्या पदयात्रेतून राजकीय शक्तीचे दर्शन होणार आहे. यासाठी काँग्रेस नेते सुशील कुमार शिंदे, खासदार प्रणिती शिंदे, पालकमंत्री जयकुमार गोरे, आमदार सचिनकल्याण शेट्टी, आमदार सुभाष देशमुख, आमदार विजयकुमार देशमुख, आमदार देवेंद्र कोठे असे सर्वच स्टार प्रचारक पदयात्रेत उतरतील. एकूणच आज सोलापुरात अभूतपूर्व असे दोन्ही सोहळे पाहता येणार आहेत.
‘सारे’ जमी पर..! ‘भक्ती’ आणि ‘शक्ती’ चे आज सोलापुरात दर्शन..
