पुणे महानगरपालिका शिक्षण विभागाच्या वतीने आयोजित आंतरशालेय अंतिम क्रीडा स्पर्धा २०२५–२६ या दिनांक २२ व २४ जानेवारी २०२६ रोजी खाशाबा जाधव क्रीडा निकेतन, दत्तवाडी, सिंहगड रोड येथे मोठ्या उत्साहात संपन्न झाल्या. या स्पर्धांमध्ये पुणे महानगरपालिकेच्या शिक्षण विभागातील १५ क्षेत्रीय विभागांतील शाळांनी सहभाग घेतला होता. या क्रीडा स्पर्धांचे उद्घाटन प्रसन्न जगताप (नवनिर्वाचित नगरसेवक), वृषाली रिठे (नगरसेविका), प्रिया गदादे (नगरसेविका), सुनंदा वाखारे मॅडम (प्रशासकीय अधिकारी, प्राथमिक शिक्षण विभाग), माणिक देवकर साहेब (क्रीडा विभागप्रमुख) तसेच क्रीडा विभागातील सहाय्यक प्रशासकीय अधिकारी व सर्व क्रीडा अधिकाऱ्यांच्या उपस्थितीत संपन्न झाले. कार्यक्रमाचे प्रास्ताविक क्रीडा विभागप्रमुख माणिक देवकर साहेब यांनी केले. यावेळी पुणे महानगरपालिकेच्या स्काऊट-गाईड पथकाने उपस्थित मान्यवरांना मानवंदना देत क्रीडाज्योत प्रज्वलन करून कार्यक्रमाची औपचारिक सुरुवात केली. या प्रसंगी पुणे महानगरपालिकेतील विविध राष्ट्रीय स्तरावरील खेळाडूंचा सत्कार करण्यात आला.
प्रशासकीय अधिकारी सुनंदा वाखारे मॅडम यांनी खेळाडूंना खेळातील शिस्त, जिद्द तसेच शिक्षणाचे महत्त्व याविषयी प्रेरणादायी मार्गदर्शन केले. उपस्थित मान्यवर नगरसेवकांनी क्रीडा विभागाला पुढील काळात कोणत्याही प्रकारची अडचण आल्यास ती सोडवण्यासाठी सर्वतोपरी सहकार्य करण्याचे आश्वासन दिले. तसेच विद्यार्थ्यांमध्ये क्रीडाभावना रुजवण्यासाठी शिक्षकांनी घेतलेल्या प्रयत्नांना भविष्यातही साथ देण्याचे आवाहन केले. स्पर्धेदरम्यान सहभागी खेळाडू व शिक्षकांसाठी क्रीडा विभागामार्फत उत्कृष्ट अल्पोपहार व जेवणाची व्यवस्था करण्यात आली होती, याबद्दल खेळाडू व शिक्षकांनी समाधान व्यक्त केले. पुणे महानगरपालिकेच्या अंतिम आंतरशालेय क्रीडा स्पर्धा उत्साहात पार पडल्याने सर्व सहभागी व विजेत्या खेळाडूंमध्ये आनंदाचे व समाधानाचे वातावरण पाहायला मिळाले. क्रीडा विभागप्रमुख माणिक देवकर साहेब यांच्या शिस्तबद्ध व काटेकोर नियोजनामुळे या स्पर्धा यशस्वीपणे पार पडल्या. भविष्यातही अशाच प्रकारच्या स्पर्धा सातत्याने आयोजित करण्यात येतील, असे आश्वासन क्रीडा मार्गदर्शक, खेळाडू व शिक्षकांनी व्यक्त केले.
