महापालिका निवडणुकीच्या तोंडावर भाजपात आयारामांची गर्दी वाढली असून त्यांनाच तिकीट मिळण्याची दाट शक्यता असल्याने बंडखोरी होण्याची शक्यता आहे. अशात इच्छुक उमेदवारांनी उमेदवारी न दिल्यास पक्ष कार्यालयासमोर आत्मदहन करून, विषारी औषध प्राशन करून आत्महत्या करण्याची धमकी वरिष्ठ नेत्यांना दिल्याने भाजपात कमालीची भीती निर्माण झाली आहे. या पार्श्वभूमीवर भाजपच्या शहराध्यक्षा रोहिणी तडवळकर यांनी पक्ष कार्यालयासमोर तीन दिवस पोलीस बंदोबस्त लावण्यात यावा असे पत्र पोलीस आयुक्तांना दिले आहे. दरम्यान आज दुपारी दोन वाजेपर्यंत निवडणूक निर्णय अधिकाऱ्यांना सर्व उमेदवारांचे अधिकृत एबी फॉर्म देण्यात येणार आहे. उमेदवारीवरून भाजपामध्ये नाराजीचा स्फोट होण्याची भीती असून निष्ठावंत कार्यकर्ते कोणती भूमिका घेतात याकडे शहरवासीयांचे लक्ष लागले आहे.
भाजपात ज्वालामुखी होण्याची शक्यता; पोलिसांकडे बंदोबस्ताची मागणी
