नवी दिल्ली : विरोधकांकडून करण्यात आलेल्या पेगॅसस हेरगिरी, इंधनाच्या वाढलेल्या किंमती तसेच कृषी कायद्यांच्या मुद्यावर चर्चेच्या मागणीवरून संसदेचं कामकाज अनेकदा प्रभावित झालंय. विरोधकांच्या या मागणीवर अडचणीतून बाहेर पडण्यासाठी सत्ताधारी भाजपलाही अद्याप मार्ग सुचू शकलेला नाही. मात्र, आज दोन वेगवेगळ्या विरोधी पक्षांचे नेते एकमेकांशीच भिडताना दिसले.हा प्रकार आज सकाळी संसदेच्या गेट क्रमांक ४ जवळ दिसून आला. पंजाबचे काँग्रेस खासदार रवनीत सिंह बिट्टू आणि माजी केंद्रीय मंत्री, अकाली दलाच्या खासदार हरसिमरत कौर बादल हे एकमेकांसमोर येताच या दोघांच्या शाब्दिक फैरी झडलेल्या पाहायला मिळाल्या.
सदनाचे कामकाज सुरू होण्यापूर्वी रवनीत सिंह बिट्टू गेट क्रमांक ४ मधून लोकसभेत सहभागी होण्यासाठी जात होते. याच वेळी कृषी कायद्यांविरोधात पोस्टर फडकावत हरसिमरत कौर बादल आणि अकाली दलाचे इतर खासदार इथे उभे असलेले त्यांच्या नजरेस पडले.
हरसिमरत कौर यांना पोस्टरबाजी करताना पाहून रवनीत सिंह बिट्टू यांचा पार चढला आणि त्यांनी हरसिमरत कौर यांच्यावर नाटक करत असल्याचा आरोप केला. कृषी कायदे तयार करण्यात आले आणि मंत्रिमंडळानं या कायद्यांना मंजुरी दिली तेव्हा शिरोमणी अकाली दल मोदी मंत्रिमंडळाचाच एक भाग होते आणि हरसिमरत कौर बादल या केंद्रीय मंत्री होत्या, याची रवनीत सिंह यांनी पुन्हा एकदा आठवण करून दिली.रवनीत सिंह बिट्टू यांचे आरोप सहन न झाल्यानं हरसिमरत कौरही त्यांना भिडल्या आणि या दोन्ही नेत्यांत शाब्दिक चकमकीला सुरूवात झाली.हरसिमरत कौर बादल यांनी रवनीत सिंह बिट्टू यांच्यावर खोटा प्रचार करण्याचा आणि काँग्रेसकडून जबाबदारीतून पळ काढण्याचा प्रयत्न होत असल्याचा आरोप केला.आपण मंत्री असताना मंत्रिमंडळाच्या बैठकीत कृषी कायद्यांवर अकाली दलाकडून विरोध दर्शवण्यात आला होता, हे अगोदरच हरसिमरत कौर यांनी स्पष्ट केले होते . तसंच पंजाब-हरयाणामधून कृषी कायद्यांना प्रखर विरोध झाल्यानंतर याच मुद्यावर अकाली दलाने सत्तेतून बाहेर पडण्याचा निर्णयही घेतला होता.
