येस न्युज मराठी नेटवर्क: खूनासह दरोडा, घरफोडी, मंदिर चोरी अशा विविध पाच गुन्ह्यांमध्ये गेल्या आठ वर्षांपासून पाहिजे असलेला कुविख्यात दरोडेखोर जेरबंद करण्यात सोलापूर ग्रामीण विभागाच्या स्थानिक गुन्हे शाखेला यश मिळाले आहे. मोहोळ तालुक्यातील जामगाव येथे राहणारा सपाल्या उर्फ हनुमंत भिमशा शिंदे या चाळीस वर्षाच्या गुन्हेगारास अटक करण्यात पोलिसांना यश मिळाले आहे. त्याच्याविरुद्ध कामती पोलीस ठाण्यात पाच गुन्हे, मंद्रूप पोलीस ठाण्यात दोन आणि पुणे जिल्ह्यातील हडपसर पोलीस ठाण्यात गुन्हा दाखल होता.
त्याने पुणे जिल्ह्यातील हडपसर येथून चोरून आणलेली एक शाईन मोटर सायकल त्याचप्रमाणे १७० ग्रॅम वजनाचे सोन्याचे दागिने, ५५ ग्रॅम वजनाचे चांदीचे दागिने असा एकूण ८,४९,००० रुपये किंमतीचा मुद्देमाल पोलिसांनी जप्त केला आहे. पकडण्यासाठी पोलिसांनी टाकळी गावातील एका दवाखान्यात सापळा रचला होता. सपाल्या हा त्याच्या पत्नीला औषधोपचारासाठी या दवाखान्यात घेऊन येणार असल्याची खबर लागल्यानंतर पोलिसांनी सापळा रचून त्याला पकडण्याचा प्रयत्न केला. परंतु या दवाखान्याच्या तारेच्या कुंपणावरून उडी मारून सपाल्याने पळून जाण्याचा प्रयत्न केला. परंतु पोलिसांनी शिताफीने पाठलाग करत त्याला ताब्यात घेतले. सपाल्या हा सांगली जिल्ह्यात त्याच्या नातेवाईकांकडे गेलेला असल्याची माहिती मिळाली होती . मिरज तालुक्यात टाकळी येथे आलेला असताना पोलिसांनी ही कारवाई केली . पोलीस अधीक्षक तेजस्वी सातपुते तसेच स्थानिक गुन्हे शाखेचे पोलीस निरीक्षक सर्जेराव पाटील यांच्या नेतृत्वाखाली पोलीस पथकाने ही कारवाई केली . सहाय्यक पोलीस निरीक्षक रवींद्र मांजरे व त्यांच्या पथकाने तातडीने हालचाली करून हे यश मिळवले आहे. सपाल्या हा ज्यांच्याकडे आश्रयासाठी राहत असे त्यांना चोरून आणलेले दागिने ठेवून काही रक्कम देखील देत असल्याचे उघडकीस आले आहे. याप्रकरणी अधिक तपास कामती पोलीस ठाण्याचे सहाय्यक पोलीस निरीक्षक अंकुश माने व त्यांचे पथक करीत आहे.
