सोलापूर – केंद्र सरकारच्या राष्ट्रीय आरोग्य अभियानांतर्गत (NHM) आरोग्य संस्थांच्या दर्जा आणि सुविधांची पाहणी करून राष्ट्रीय गुणवत्ता आश्वासन मानांकन (National Quality Assurance Standards – NQAS) प्रदान करण्यात येते. यामध्ये दक्षिण सोलापूरमधील बोरामणी प्राथमिक आरोग्य केंद्र अंतर्गत कार्यरत मुस्ती उपकेंद्राला सर्वोच्च (84%,) गुण प्राप्त झाले असून यासोबत मोहोळ तालुक्यातील येवती(83%) आणि औंढी (82%)या तीनआरोग्य मंदिरांना हे मानांकन प्राप्त झाले आहे.
राष्ट्रीय NQAS मूल्यांकन हे आरोग्य सेवेतील गुणवत्ता, रुग्णकेंद्रित सेवा, सुरक्षितता, स्वच्छता, व्यवस्थापन आणि प्रभावी सेवा वितरण व आरोग्य विषयक जागरूकता यांचे राष्ट्रीय स्तरावरील सर्वोच्च मानांकन असून या मानांकनामुळे उपकेंद्र स्तरावर रुग्णकेंद्रित, सुरक्षित, संसर्गमुक्त आणि अत्यंत दर्जेदार आरोग्यसेवा अधिक बळकट होण्यास मदत होईल.प्रशासकीय सुधारणा: आरोग्य केंद्रांमधील सेवा वितरण, रुग्ण सुरक्षा, औषध व आधुनिक उपकरण व्यवस्थापन, नोंदवही व्यवस्थापन तसेच रुग्णांच्या समाधानात सातत्याने वाढ होईल. मानांकन प्राप्त संस्थांना राष्ट्रीय आरोग्य अभियानांतर्गत विशेष प्रोत्साहन निधी मिळण्यास पात्रता प्राप्त होते. या निधीचा वापर पायाभूत सुविधा, आधुनिक वैद्यकीय उपकरणे आणि रुग्णसुविधा अधिक मजबूत करण्यासाठी केला जाईल.
मुख्य कार्यकारी अधिकारी कुशल जैन तसेच जिल्हा आरोग्य अधिकारी डॉ. सतीश कोपुरवाड, अतिरिक्त जिल्हा आरोग्य अधिकारी डॉ. नंदकिशोर घाडगे, सहायक संचालक (कुष्ठरोग) डॉ. मोहन शेगर आणि जिल्हा माता-बाल संगोपन अधिकारी डॉ. हर्षल जाधव यांच्या मार्गदर्शनाखाली दक्षिण सोलापूरच्या तालुका आरोग्य अधिकारी डॉ.घोगरे, वै.अ.डॉ.संतोषकुमार, समुदाय आरोग्य अधिकारी (CHO) अरुण पाळवदे,आरोग्य सेविका चंद्रकला सलगरे,आरोग्य सेवक केदार गायकवाड व आशा स्वयंसेविका शोभा कळके,कविता तोरकडे,प्रमिला करपे,बेबी जमादार,संगीता सोळसे अर्धवेळ परिचर कोळी यांच्या टीमने अथक परिश्रम करून हे मानांकन प्राप्त केले आहे.
या उल्लेखनीय कामगिरीबद्दल संबंधित अधिकारी, कर्मचारी यांचे पालकमंत्री जयकुमार गोरे,जिल्हा परिषदेचे अध्यक्ष दिपक वैद्य, उपाध्यक्ष इंद्रजित पवार, शिक्षण व आरोग्य समितीचे सभापती चेतनसिंह केदार, समाज कल्याण सभापती संस्कृती सातपुते, कृषी व संवर्धन समितीचे सभापती रामप्पा चिवडशेट्टी, महिला बाल कल्याण समितीचे सभापती अमृता वाघे यांनी अभिनंदन केले आहे.
जिल्ह्यातील सर्व आरोग्य संस्थेचे NQAS मानांकन प्राप्त करण्याचा मानस असून ग्रामीण आरोग्य सेवेत आमूलाग्र बदल घडवून जनतेला दर्जेदार व सुरक्षित आरोग्य सेवा देण्यासाठी प्रयत्न राहील..
कुशल जैन. मुख्य कार्यकारी अधिकारी,
जिल्हा परिषद सोलापूर.
