९ लाख ८३ हजारांहून अधिक बालकांना जंतमुक्त करण्याचे उद्दिष्ट; पालकांनी सहकार्य करावे – मुख्य कार्यकारी अधिकारी कुशल जैन यांचे आवाहन
सोलापूर : सोलापूर जिल्ह्यात १ ते १९ वयोगटातील बालकांना जंतमुक्त करण्यासाठी राष्ट्रीय जंतनाशक मोहीम आज संपूर्ण जिल्ह्यात उत्साहात राबविण्यात आली. जिल्हा परिषद मुख्य कार्यकारी अधिकारी कुशल जैन यांच्या मार्गदर्शनाखाली आणि जिल्हा आरोग्य अधिकारी डॉ. सतीश कोपुरवाड यांच्या नेतृत्वाखाली ही मोहीम राबविण्यात आली. या मोहिमेंतर्गत जिल्ह्यातील एकूण ९ लाख ८३ हजार ७०६ बालकांना जंतनाशक गोळ्या देण्याचे उद्दिष्ट ठेवण्यात आले आहे.
जिल्ह्यातील शाळा, अंगणवाड्या आणि आरोग्य संस्थांच्या माध्यमातून १ ते १९ वयोगटातील बालकांना जंतनाशक गोळ्यांचे वाटप करण्यात आले. बालकांचे आरोग्य चांगले राहावे, त्यांच्यातील रक्तक्षय व अशक्तपणा कमी व्हावा आणि त्यांची शारीरिक व बौद्धिक वाढ योग्य प्रकारे व्हावी, या उद्देशाने ही मोहीम राबविण्यात येत आहे.
जिल्हा आरोग्य अधिकारी डॉ. सतीश कोपुरवाड यांनी उत्तर सोलापूर तालुक्यातील आयुष्मान आरोग्य मंदिर, कोंडी येथे भेट देऊन मोहिमेच्या कामाचा आढावा घेतला. त्यानंतर जिल्हा परिषद शाळा, कोंडी येथे विद्यार्थ्यांना स्वतःच्या हस्ते जंतनाशक गोळ्या देऊन मोहिमेचा शुभारंभ केला. यावेळी त्यांनी विद्यार्थ्यांना जंतमुक्तीचे महत्त्व समजावून सांगितले.
जंतमुक्तीमुळे बालकांचे आरोग्य आणि भविष्य सुरक्षित
यावेळी जिल्हा परिषद मुख्य कार्यकारी अधिकारी कुशल जैन म्हणाले, जंतसंसर्गामुळे बालकांमध्ये रक्तक्षय, अशक्तपणा निर्माण होऊ शकतो. तसेच त्यांच्या शारीरिक व बौद्धिक विकासावरही परिणाम होऊ शकतो. जंतनाशक गोळ्यांच्या नियमित सेवनामुळे बालकांचे आरोग्य सुधारण्यास मदत होते. जिल्ह्यातील ९ लाख ८३ हजारांहून अधिक बालकांपर्यंत या मोहिमेचा लाभ पोहोचविण्याचे उद्दिष्ट आहे.
मोहिमेच्या दिवशी ज्या बालकांना जंतनाशक गोळी घेता आली नाही, अशा बालकांना ३ नोव्हेंबर २०२६ रोजी आयोजित मॉप-अप राऊंडमध्ये गोळी देण्यात यावी. यासाठी पालकांनी आरोग्य विभागाला सहकार्य करावे, असे आवाहनही मुख्य कार्यकारी अधिकारी कुशल जैन यांनी केले.
या कार्यक्रमास सहाय्यक संचालक (कुष्ठरोग) डॉ. मोहन शेगर, अतिरिक्त जिल्हा आरोग्य अधिकारी डॉ. नंदकिशोर घाडगे, जिल्हा माता व बाल संगोपन अधिकारी डॉ. हर्षल जाधव, तालुका आरोग्य अधिकारी डॉ. चंद्रकांत आयवळे, आयुष्मान आरोग्य मंदिराचे वैद्यकीय अधिकारी डॉ. कांबळे, जिल्हा परिषद शाळा कोंडीचे मुख्याध्यापक, वर्गशिक्षक तसेच विद्यार्थी व विद्यार्थिनी मोठ्या संख्येने उपस्थित होते.
