३० ऑक्टोबरपासून प्रारंभ; श्री गुरूतत्व प्रदीप परिवार सोलापूरतर्फे आयोजन, २९ ला शोभायात्रा
सोलापूर : गाणगापूर येथे पहिल्या टप्प्यातील अनुष्ठानपूर्ती यशस्वी झाल्यानंतर आता तुळजापुरात श्री दत्त-दुर्गा महानुष्ठानम् आयोजित करण्यात आले आहे. श्री गुरूतत्व प्रदीप परिवार सोलापूरतर्फे ३० ऑक्टोबरपासून सुरू होणाऱ्या या महानुष्ठानासाठी आतापर्यंत दीड हजार भक्तांनी नोंदणी केली आहे. महाराष्ट्रातील १५ जिल्ह्यांसह कर्नाटकातील भक्तही या आध्यात्मिक उपक्रमात सहभागी होणार आहेत. यासाठी परिवारातर्फे गेल्या दोन महिन्यांपासून तयारी सुरू आहे.
महानुष्ठानात सहभागी होण्यासाठी भक्तांना २९ ऑक्टोबरपर्यंत नोंदणी करता येणार आहे. या उपक्रमाच्या निमित्ताने गुरुवारी (ता.२९) दुपारी ४ वाजता तुळजापुरातील छत्रपती शिवाजी महाराज पुतळा येथून शोभायात्रा काढण्यात येणार आहे. किसान चौकी, आरे चौक, कमान वेस, मंगळवार चौक आणि धाराशिव रोडमार्गे ही शोभायात्रा इच्छापूर्ती गणेश मंदिरात पोहोचेल. शोभायात्रेत महिलांनी पिवळे वस्त्र, तर पुरुषांनी पिवळा शर्ट परिधान करून सहभागी व्हावे, असे आवाहन आयोजकांनी केले आहे.
दररोज असे होणार आध्यात्मिक कार्यक्रम
महानुष्ठानादरम्यान दररोज सकाळी ६ वाजता हरिद्राकुंकुम सडा व दत्तदुर्गा पंचामृत अभिषेक होईल. सकाळी ८ वाजता सत्यअंबा व कुंकुमार्चन तसेच नित्योपासना, सकाळी १०.३० वाजता पारायणास प्रारंभ, दुपारी १२ वाजता बोडन सेवा आणि दुपारी ३ वाजता कथामृत होणार आहे. रात्री ८ ते १० या वेळेत देवी उपासना, जागरण व गोंधळ होईल. याशिवाय पाच दिवस दररोज सकाळी ९ वाजता सहस्रचंडी हवन आयोजित करण्यात आले आहे. तसेच १००८ सुवासिनींची बोळवण सेवा होणार आहे. या महानुष्ठानाचे स्थळ राम रेसिडेन्सी, धाराशिव रोड, तुळजापूर असे आहे.
गुरूचरित्र सारामृत ॲपद्वारेही पारायणाची संधी
महानुष्ठानासाठी नोंदणी न केलेल्या भक्तांनाही या कालावधीत पारायणात सहभागी होता येणार आहे. त्यासाठी गुरूचरित्र सारामृत या ॲपचा वापर करता येईल, अशी माहिती आयोजकांनी दिली आहे.
