सोलापूर- सोलापूर महानगरपालिकेच्या घनकचरा व्यवस्थापन विभागामार्फत पावसाळ्याच्या पार्श्वभूमीवर शहरात १ ते ९ जुलै २०२६ या कालावधीत दररोज प्रत्येक झोन अंतर्गत एक भागामध्ये असे एकूण ७२ भागांमध्ये विशेष स्वच्छता मोहीम राबविण्यात येणार आहे. या मोहिमेअंतर्गत आज शहरातील विभागीय कार्यालय क्रमांक 1 येथील छत्रपती संभाजी महाराज चौक येथे महापौर विनायक कोंड्याल यांच्या उपस्थितीत स्वच्छता अभियानाची सुरुवात करण्यात आली. स्वच्छता सुरू करण्या अगोदर स्वच्छतेची शपथ घेण्यात आली.
यावेळी उपमहापौर ज्ञानेश्वरी देवकर, सभागृह नेते नरेंद्रजी काळे, नगरसेवक बिज्जू प्रधाने, नगरसेविका मंदाकिनी तोडकरी, नगरसेवक समाधान आवळे, घनकचरा व्यवस्थापन विभागाचे सहाय्यक आयुक्त तथा नियंत्रण अधिकारी शशिकांत भोसले, मुख्य सफाई अधीक्षक अनिल चराटे, सफाई अधीक्षक सूर्यकांत लोखंडे, सफाई अधीक्षक वाहन वासुदेव नडीमेटला, झोन 1 चे मुख्य आरोग्य निरीक्षक बच्चू व झोन 1 कडील सर्व आरोग्य निरीक्षक तसेच महानगरपालिकेचे अधिकारी, कर्मचारी व सफाई कर्मचारी वर्ग उपस्थित होते.
या विशेष स्वच्छता मोहिमेत शहरातील मुख्य रस्ते, सार्वजनिक ठिकाणे, नाले, गटारी, चौक तसेच विविध परिसरांची व्यापक स्वच्छता करण्यात येणार आहे. साचलेला गाळ व माती काढणे, झुडपे व गवत हटविणे, कचरा उचलणे, रस्त्यांची स्वच्छता, डास प्रतिबंधक उपाययोजना तसेच आरोग्याच्या दृष्टीने आवश्यक स्वच्छता कामांवर विशेष भर देण्यात येणार आहे.
यावेळी महापौर विनायक कोंड्याल यांनी नागरिकांना आवाहन करताना सांगितले की, “स्वच्छ, सुंदर आणि निरोगी सोलापूर घडविण्यासाठी महानगरपालिका सातत्याने प्रयत्नशील आहे. या विशेष स्वच्छता मोहिमेत नागरिकांनी सक्रिय सहभाग घेऊन परिसर स्वच्छ ठेवावा, कचरा उघड्यावर न टाकता घंटागाडीतच टाकून महानगरपालिकेस सहकार्य करावे. नागरिकांच्या सहकार्याशिवाय स्वच्छतेचे उद्दिष्ट पूर्ण होऊ शकत नाही.”
या स्वच्छता मोहिमेमध्ये सोलापूर महानगरपालिकेने नागरिकांना, विद्यार्थ्यांना, बचत गट महिलांना, विविध सेवाभावी संस्थांना, इत्यादींना सहभागी होऊन आपल्या परिसराच्या स्वच्छतेसाठी सहकार्य करण्याचे आवाहन केले आहे. शहर अधिक स्वच्छ, सुंदर व आरोग्यदायी ठेवण्यासाठी सर्व विभागांच्या समन्वयातून ही मोहीम प्रभावीपणे राबविण्यात येणार आहे.
