TOP 25 । पालकमंत्र्यांच्या आवाहनाला खासदार प्रणिती शिंदे यांनी केला विरोध…!

सोलापूर स्थानिक स्वराज्य संस्था मतदार संघाच्या निवडणुकीसाठी उमेदवारी अर्ज भरण्यासाठी अवघे दोनच दिवस शिल्लक राहिले आहेत. उद्या आणि परवा सुट्टी असल्यामुळे आज आणि सोमवारी जिल्हाधिकारी कार्यालयात या मतदारसंघ निवडणुकीसाठी अर्ज भरता येणार आहे. आजवर 26 जणांनी अर्ज लिहिले आहेत मात्र एकाही उमेदवारांनी अर्ज भरला नाही. सोलापूर जिल्हा परिषद सदस्य, पंचायत समितीचे सभापती, नगरपालिकेचे नगरसेवक आणि महापालिकेचे नगरसेवक असे 616 मतदार हे स्थानिक स्वराज्य संस्था मतदारसंघातील आमदार निवडून देणार आहेत. साडेतीनशे पेक्षा जास्त सदस्य म्हणजेच मतदार हे भाजपचे असल्यामुळे आणि विरोधकांचीं संख्याबळ नगण्य असल्यामुळे ही निवडणूक बिनविरोध करण्याचे आवाहन पालकमंत्री जयकुमार गोरे यांनी केले होते. मात्र काँग्रेसच्या खासदार प्रणिती शिंदे यांनी पालकमंत्र्यांच्या या आव्हानाला छेद दिला आहे. विधान परिषद निवडणूक बिनविरोध होणार नाही. आमची संख्याबळ कमी असली तरीही लोकशाहीसाठी काँग्रेस ही निवडणूक लढविणार असून आज किंवा उद्या काँग्रेस पक्षाकडून उमेदवारीची घोषणा होईल असे वक्तव्य खासदार प्रणिती शिंदे यांनी केले आहे.