पीएम किसान योजनेच्या लाभासाठी बँक खाते आधारशी जोडणे बंधनकारक – निवासी उपजिल्हाधिकारी शमा पवार

जिल्ह्यात 1 लाख 15 हजार 719 लाभार्थ्यांची खाती प्रलंबित
सोलापूर : प्रधानमंत्री किसान सन्मान निधी योजनेतर्गंत १३ व्या हप्त्याच्या लाभासाठी बँक खाते आधारशी जोडणे बंधनकारक केले आहे. जिल्ह्यात सद्यस्थितीत 1 लाख 15 हजार 719 लाभार्थ्यांची बँक खाती आधारशी संलग्न करण्यासाठी प्रलंबित आहेत. तरी लाभार्थ्यांनी तात्काळ बँक खाती आधारशी संलग्न करुन घ्यावीत असे आवाहन निवासी उपजिल्हाधिकारी शमा पवार यांनी केले आहे.
माहे डिसेंबर 2022 ते मार्च- 2023 या कालावधीतील पी.एम. किसान योजनेच्या तेराव्या हप्त्याचा लाभ मिळण्यासाठी पात्र लाभार्थीची बँक खाते आधारशी जोडणे बंधनकारक केले आहे. प्रधानमंत्री किसान सन्मान निधी योजनेतर्गंत जिल्ह्यातील प्रलंबित लाभार्थ्यांचा तपशील पी.एम किसान पोर्टलवरील Reports पर्यायातील Status of Adhar Seeded Bank Accounts या पर्यायामध्ये उपलब्ध आहे.
केंद्र शासनाने दिनांक २४ जानेवारी, २०२३ रोजीच्या दूरचित्रवाणी परिषदेमध्ये बँक खाती आधार संलग्न केलेल्या लाभार्थीना १३ व्या हप्त्याचा लाभ अदा होणार असल्याचे कळविले आहे. त्यानुसार बँक खाती आधार संलग्न करणे व प्रलंबित असलेल्या लाभार्थीची इंडिया पोस्ट पेमेंट्स बँकेत खाती उघडण्याबाबतची कार्यवाही युध्दपातळीवर करण्याचे केंद्र शासनाचे निर्देश आहेत. शेतकरी लाभार्थी प्रधानमंत्री किसान सन्मान निधी योजनेच्या लाभापासून वंचित राहणार नाही यासाठी इंडिया पोस्ट पेमेंट्स बँकेत गावपातळीवर मोहिम सुरु करण्यात आली आहे. या योजनेचा लाभार्थ्यांनी लाभ घ्यावा, असे आवाहनही निवासी उपजिल्हाधिकारी श्रीमती पवार यांनी केले आहे.