सोलापूर महापालिकेच्या उत्पन्नात वाढ करण्याच्या दृष्टीने विविध विभागांचा आढावा घेण्यात येत असून, मालमत्ता कर विभागाच्या बैठकीनंतर महापालिकेतील भूमी-मालमत्ता विभागाच्या अखत्यारित असलेल्या मेजर व मिनी गाळ्यांबाबत महत्त्वपूर्ण बैठक महापौर विनायक कोंड्याल यांच्या अध्यक्षतेखाली घेण्यात आली.
या बैठकीस उपमहापौर ज्ञानेश्वरी देवकर, सभागृह नेते नरेंद्र काळे, स्थायी समिती सभापती रंजिता चाकोते, महापालिका आयुक्त डॉ. सचिन ओम्बासे, अतिरिक्त आयुक्त वीणा पवार, मुख्यलेखा अधिकारी रत्नराज जवळगेकर, उपायुक्त सोनाली यादव, सहायक आयुक्त विनोद कुलकर्णी व संबंधित अधिकारी उपस्थित होते.
या बैठकीमध्ये महापालिकेच्या मालकीच्या विविध मेजर व मिनी गाळ्यांची सद्यस्थिती, गाळेधारकांकडून येणे असलेली थकबाकी, झालेली वसुली, प्रलंबित वसुली तसेच थकबाकीदार गाळेधारकांवर करण्यात आलेली कारवाई याबाबत सविस्तर आढावा घेण्यात आला.
यावेळी शहरातील महापालिकेच्या अखत्यारित एकूण किती मेजर व मिनी गाळे आहेत, त्यापैकी किती गाळेधारकांकडून नियमित भाडे व इतर देयके जमा केली जात आहेत, किती गाळ्यांची थकबाकी प्रलंबित आहे, तसेच थकबाकीदार गाळेधारकांना आतापर्यंत किती नोटिसा बजावण्यात आल्या आहेत, याची माहिती महापौरांनी संबंधित अधिकाऱ्यांकडून घेतली.
तसेच थकबाकी असलेल्या किती गाळ्यांवर सीलची कारवाई करण्यात आली आहे, किती गाळ्यांकडून वसुली झाली आहे आणि अद्याप किती गाळ्यांची थकबाकी बाकी आहे, याबाबतही सविस्तर चर्चा करण्यात आली. महापालिकेने जाहीर केलेल्या अभय योजनेअंतर्गत गाळ्यांकडून झालेल्या वसुलीचाही आढावा यावेळी घेण्यात आला.
महापौर विनायक कोंड्याल यांनी महापालिकेच्या उत्पन्नवाढीसाठी थकबाकी वसुलीला प्राधान्य देण्याच्या सूचना दिल्या. ज्या गाळेधारकांना थकबाकीबाबत नोटिसा बजावण्यात आल्या आहेत, त्यांच्याकडून लवकरात लवकर थकबाकीची वसुली करण्यात यावी. तसेच उर्वरित सर्व थकबाकीदार गाळेधारकांकडूनही नियमानुसार वसुलीची कार्यवाही पूर्ण करावी, असे निर्देश त्यांनी संबंधित अधिकाऱ्यांना दिले.
महापालिकेच्या मालमत्तेचा योग्य वापर होण्याबरोबरच महापालिकेचे उत्पन्न वाढणे आवश्यक असून, थकबाकीदारांकडून वसुलीसाठी सातत्याने पाठपुरावा करून आवश्यकतेनुसार नियमानुसार कारवाई करावी, असेही महापौरांनी स्पष्ट केले.
महापालिकेच्या आर्थिक उत्पन्नाचा महत्त्वाचा स्रोत असलेल्या गाळे भाडे व थकबाकी वसुलीमध्ये कोणतीही दिरंगाई होऊ नये आणि उपलब्ध असलेली सर्व देय रक्कम महापालिकेच्या तिजोरीत जमा होण्यासाठी विभागाने प्रभावी नियोजन करावे, अशा सूचनाही महापौर विनायक कोंड्याल यांनी यावेळी दिल्या.
