११ वा आंतरराष्ट्रीय योग दिनाच्या पार्श्वभूमीवर
अपर जिल्हाधिकारी यांच्या हस्ते दोन दिवसीय योग शिबीराचे उदघाटन संपन्न
रिमझिम पावसात युवकांनी केला योगाभ्यास
सोलापूर, दि २३ : तपश्चर्या आणि आत्मसंयमाने शरीर निरोगी आणि मन शांत होते. आणि यासाठी एक प्रमुख माध्यम म्हणजे योग आणि खेळ. घर असो वा कार्यालय, शाळा असो वा उद्यान, आपल्याला व्यायाम हा जीवनाचा एक भाग बनवावा लागेल, असे प्रतिपादन अपर जिल्हाधिकारी मोनिका सिंह यांनी आज येथे केले. २१ जून रोजी होणाऱ्या ११ व्या आंतरराष्ट्रीय योग दिनाच्या पार्श्वभूमीवर भारत सरकार माहिती व प्रसारण मंत्रालयाच्या केंद्रिय संचार ब्यूरो, सोलापूर आणि जिल्हा क्रीडा कार्यालय यांचे सयुंक्त विद्यमाने शासकीय मैदान, नेहरू नगर, सोलापूर येथे सकाळी ६ ते ८ वाजेपर्यंत आयोजित दोन दिवसीय योग अभ्यास शिबिराच्या उद्घाटन प्रसंगी श्रीमती सिंह बोलत होत्या.
यावेळी सहायक प्रसिद्धी अधिकारी अंबादास यादव, जिल्हा क्रीडा अधिकारी नरेंद्र पवार, नीर सोशल फौंडेशनचे अध्यक्ष हेमंत जाधव, न्यू जॉगर्स फौंडेशनचे अध्यक्ष संतोष आरवत्तु, उद्योजक वीरेश नसले, निवृत्त अधिकारी सतीश घोडके, ज्येष्ठ पत्रकार अजितकुमार संगवे, योग सेवा मंडळाचे अध्यक्ष सुनील आळंद, विवेकानंद केंद्राचे नंदकुमार चितापुरे, स्वामी समर्थ अकेडमीचे रवी राठोड, विराट स्पोर्ट्सचे सूर्याजी लिंगाडे, सिद्धेश्वर करिअर अकेडमीचे अतुल शिंदे आणि माजी अध्यक्ष संतोष कदम आदी मान्यवर उपस्थित होते. श्रीमती सिंह म्हणाल्या योगसाधनेच्या निरंतर अभ्यासामुळे शरीर, मन आणि आत्मा यांची सांगड घातली जाते. ते एकमेकांना जोडले जावून त्यांच्यातील समतोल राखण्यास मदत होते. नियमित योग केल्याने शारीरिक व मानसिक आरोग्य सुधारते.सदरील योग दिनानिमित्त केंद्रीय दररोज एक योग आसनांची चित्र व मजकुरासहित माहिती देण्यात येणार आहे. त्यामुळे योग सराव करण्यास मदत होणार आहे. तसेच शिबिराच्या विविध ठिकाणी योगासनांची माहिती मोबाईल वर मिळवण्यासाठी क्यू आर कोड लावण्यात आले आहे तसेच सदर योग शिबीर दोन दिवसीय असून उद्या दिनांक २४ मे रोजी देखील युवकांनी मोठ्या उत्साहाने योग शिबिराचा लाभ घ्यावा, असे आवाहन अंबादास यादव यांनी प्रस्ताविकेतून केले.
कार्यक्रमाचे प्रास्ताविक अंबादास यादव यांनी केले. आभार नरेंद्र पवार यांनी मानले. सूत्रसंचालन अश्विनी कोंडाबत्तीन हिने केले. शिबिराची सुरुवात दीपप्रज्वलनाने करण्यात आले. जितेंद्र महामुनी यांनी शंखध्वनीने योग शिबिराची सुरुवात केली. आयुष्य मंत्रालयाने नेमून दिलेल्या प्रोटोकॉल प्रमाणे योग सेवा मंडळाचे योग गुरु मनमोहन भुतडा यांनी योगासनांची माहिती दिली आणि लता माळगे, वासुंती निंबाळकर, कालिदास कोंडा यांनी शिथिली करण्याचे व्यायाम, उभी व बैठे योगासने, पोटावरील व पाठीवरील योगासने, प्राणायाम आणि ध्यान धारणाची प्रात्यक्षिके आणि सराव करून घेतले. उद्या दिनांक २४ मे रोजी सकाळी ६ ते ८ यावेळेत विवेकानंद केंद्राचे रवी कंटली आणि त्यांचे सहकारी योग अभ्यास घेणार आहेत.
यावेळी केंद्रीय संचार ब्यूरोचे कार्यालय सहायक जे एम हन्नुरे, साईराज राऊळ, मनोज जखोटिया, काशिनाथ औरसंग, गुरुलिंग प्रचंडे, पंकज वाघमोडे, रफिक शेख, योगीराज कोंडाबत्तीन, योग सेवा मंडळाचे विद्या होनमोडे, संतोष सासवडे, दत्तगुरू वेदपाठक, सुजाता बिडकर, सुभाष जोशी आणि समर्थ करिअर अकॅडमी, प्रार्थना अकॅडमी , सिद्धेश्वर अकॅडमी आणि विराट स्पोर्टस अकेडमीचे शिक्षक, खेळाडू, वरिष्ठ नागरिक उपस्थित होते.
