सोलापूर ग्रामीण पोलिसांच्या विशेष तपास पथकाची कारवाई; गुन्ह्यातील आरोपींची संख्या २३ वर, १० जणांना अटक
सोलापूर ग्रामीण पोलिसांनी अनिष्ट व अघोरी प्रथा आणि जादूटोण्याच्या माध्यमातून नागरिकांची फसवणूक केल्याच्या प्रकरणात मोठी कारवाई केली आहे. या प्रकरणातील मुख्य आरोपी मनोहर ऊर्फ मामा चंद्रकांत मोसले याच्याकडून मिळालेल्या अवैध पैशांची विल्हेवाट लावणारा रामदास झोळ तसेच त्याचे साथीदार राजेंद्र गोकुळ हुंबे आणि लक्ष्मीकांत मनमथ लिगाडे यांच्याविरोधात पोलिसांनी कारवाई केली आहे.
मनोहर भोसले याच्याविरोधात कुर्डुवाडी पोलिस ठाण्यात गुन्हा क्रमांक १९२/२०२६ दाखल असून, अनिष्ट व अघोरी प्रथा व जादूटोणा प्रतिबंधक कायद्यासह भारतीय न्याय संहितेतील विविध कलमांन्वये २३ एप्रिल २०२६ रोजी गुन्हा दाखल करण्यात आला होता. त्यानंतर या प्रकरणातील पीडितांकडून आणखी तक्रारी प्राप्त झाल्याने सोलापूर ग्रामीण जिल्ह्यात मोसले व त्याच्या साथीदारांविरोधात एकूण सहा गुन्हे दाखल झाले आहेत. प्रकरणाचे गांभीर्य लक्षात घेऊन सोलापूर ग्रामीणचे पोलिस अधीक्षक अतुल कुलकर्णी यांनी विशेष तपास पथकाची (SIT) स्थापना केली. या पथकाने कुर्डुवाडी पोलिस ठाण्यातील गुन्ह्यात आतापर्यंत २३ आरोपी निष्पन्न केले असून १० आरोपींना अटक केली आहे.
पोलिसांच्या तपासानुसार, मनोहर मोसले हा अनिष्ट व अघोरी पूजा तसेच जादूटोण्याच्या माध्यमातून अनेक पीडितांची फसवणूक करून मोठ्या प्रमाणात अवैध पैसे मिळवत असल्याचा आरोप आहे. या पैशांची विल्हेवाट दत्तकला इन्स्टिट्यूट, स्वामी चिंचोळी, दौंड-पुणे या शिक्षण संस्थेचे संस्थापक अध्यक्ष रामदास झोळ यांच्यामार्फत लावली जात असल्याचे तपासात निष्पन्न झाल्याचे पोलिसांनी नमूद केले आहे. या प्रकरणात राजेंद्र गोकुळ हुंबे आणि लक्ष्मीकांत मनमथ लिगाडे यांना अटक करून न्यायालयासमोर हजर करण्यात आले. दोघांनाही १७ ऑगस्ट २०२६ पर्यंत पोलिस कोठडी रिमांड मिळाली आहे. दरम्यान, रामदास झोळ हा फरार असून त्याचा शोध सुरू आहे. या संपूर्ण प्रकरणाचा तपास विशेष तपास पथकामार्फत सुरू असल्याची माहिती पोलिसांनी दिली आहे.
