TOP 25 – सोलापूर महापालिकेतील बेशिस्त पार्किंगला लागेल शिस्त…!

सोलापूर महापालिकेच्या आवारात नेहमीच बेशिस्त पार्किंगचे दर्शन घडते. गेल्या तीन वर्षापासून प्रशासन होते तरीही त्यांनी या बाबीकडे लक्ष दिले नाही. आता महापालिकेत 102 नगरसेवक निवडून आले आहेत. शिवाय यामध्ये 10 स्वीकृत नगरसेवकांची भर पडणार आहे. त्यामुळे 112 नगरसेवक असलेल्या सोलापूर महापालिकेत मोठ्या प्रमाणावर चार चाकी गाडी येतात. दररोज दुचाकी वाहनांची देखील खूप मोठी वर्दळ असते मात्र प्रशासनाच्या वतीने इथे पार्किंग साठी कोणतेही नियोजन केलेले नव्हते. महापालिकेत वारंवार होणाऱ्या बैठका, मनपाच्या सभा यासाठी मोठ्या प्रमाणावर चार चाकी गाड्यातून नगरसेवक येतात त्यामुळे आता प्रशासनाने पार्किंगसाठी नियोजन करण्यास सुरुवात केली आहे. महापालिका आयुक्त सचिन ओंबासे यांनी पार्किंग संदर्भात नवीन परिपत्रक काढले आहे महापालिकेतील अधिकारी आणि कर्मचाऱ्यांसाठी हुतात्मा स्मृती मंदिराच्या पाठीमागील बाजूस पार्किंगची सोय करण्यात आली आहे. नागरिकांनी आपल्या गाड्या हुतात्मा स्मृती मंदिर आवारात किंवा इमारतीच्या पाठीमागे लावाव्यात असेही नियोजन करण्यात आले आहे. त्यामुळे लवकरच बेशिस्त पार्किंगला शिस्त लागेल अशी आशा आहे .