सोलापूर महापालिकेने 16 एप्रिल पासून विविध ठिकाणी गुंठेवारी बांधकामाचे नियमितीकरण करण्यासाठी शिबिरे आयोजित केली आहे. या शिबिराच्या ठिकाणी गरज नसणारे क्लर्क, इंजिनियर,शिपाई देखील जात असल्यामुळे सोलापूर महापालिकेतील बांधकाम परवाना विभाग आणि नगररचना विभाग वाऱ्यावर सोडल्याचे दिसत आहे. या विभागाचे अधिकारी आठवड्यातून एक किंवा दोनच दिवस ऑफिसमध्ये येतात, त्यामुळे बांधकाम परवाने, बांधकाम परवान्याचे नूतनीकरण, जागांचे लेआउट, धोकादायक इमारती बाबत निर्णय घेणे, अतिक्रमणाबाबत निर्णय देणे, डेव्हलपमेंट प्लॅनची अंमलबजावणी, विविध कामांचा अभिप्राय देणे आदी कामांकडे दुर्लक्ष होत आहे. सहाय्यक नगररचना संचालक म्हणून शेवाळे यांची नियुक्ती झाली आहे मात्र ते दर शुक्रवारी येतात तर नगररचना विभागाचे उपसंचालक झगडे हे आठवड्यातून दोनच दिवस येतात त्यामुळे या विभागात मनमानी सुरू आहे. कोणतीही जयंती आली की वर्गणी चा त्रास होतो म्हणून महापालिकेतील प्रमुख अधिकारी दहा ते पंधरा दिवस कार्यालयात बसतच नाहीत. आता कुठे कामकाज सुरू झाले तोपर्यंत शिबिराच्या नावाखाली कार्यालयाला दांडी मारली जात आहे.
बांधकाम परवानेच्या फाईल ऍटोडिसिअर मधून देऊ नका असे इथले ज्युनिअर इंजिनियर सांगतात. फायली ना मंजूर झाल्यानंतर त्रुटीची पूर्तता करून पुन्हा दाखल करण्यासाठी देखील 15 -15 दिवस स्वीकारल्या जात नाहीत. त्यामुळे बांधकाम प्रकल्प रखडले आहेत. महापालिका आयुक्तांकडे फाईल लवकर मंजूर होतात मात्र ज्युनिअर इंजिनियर, उपअभियंता, सहाय्यक संचालक नगररचना तसेच उपसंचालक नगररचना यांचे अधिकार असलेल्या फायली लवकर मंजूर केल्या जात नाहीत हे दुर्दैव. यामुळे शहर विकासाला खीळ बसत असून अनेकांनी बांधकाम परवान्याच्या फाईली देणे बंद केले आहे. महापालिका आयुक्त सचिन ओंबासे आणि महापौर विनायक कोंड्याल यांनी या गंभीर बाबीकडे लक्ष देणे गरजेचे आहे.
