उकडीचे मोदक

गणपती बाप्पांच्या स्वागतासाठी सर्वांची लगबग सुरु होते. बाप्पांच्या आगमनाने सगळ्यांनाच खूप आनंद होतो. घरोघरी सुंदर आरास केली जाते. सुगरणी छान सुग्रास पदार्थ नैवेद्यासाठी बनवतात. पण या सगळ्या पदार्थांमधे अग्रेसर पदार्थ असतो तो म्हणजे गणपती बाप्पांना आवडणारे मोदक. मोदक हे खूप वेगवेगळ्या प्रकारचे बनवले जातात. काही ठिकाणी उकडीचे मोदक तर काही ठिकाणी तळलेले मोदक बनवले जातात.
उकडीचे मोदक रेसिपी …
साहित्य :
2 वाट्या एका नारळाचे खोबरे सारणासाठी
1+1/2 वाटी बारीक चिरलेला गूळ
1 टीस्पून वेलचीपूड
2 वाट्या तांदळाचे पीठ
2 वाट्या पाणी
1 टेबलस्पून तूप. उकड काढायला आणि मोदक बनवताना
केशर काड्या मोदकांवर लावायला
पायर्‍या
ओलं खोबरं, गूळ आणि वेलची पूड मिक्स करुन एका पॅनमधे मंद गॅसवर ठेवून सतत ढवळत राहावे. आणि पॅनच्या कडेला खोबर्याचे मिश्रण सुकायला लागले की सारण तयार होते.
एका पातेल्यात दोन वाट्या पाणी घालून त्यात एक टीस्पून तूप आणि चिमूटभर मीठ घालावे. पाण्याला उकळी आल्यावर त्यात दोन वाट्या तांदूळ पीठ घालून चांगले ढवळून मिक्स करुन मग झाकण ठेवून वाफ आणावी. आणि गॅस बंद करुन दहा मिनिटे झाकून ठेवावे. नंतर जरा कोमट झाल्यावर चांगले मळून घ्यावे.
रेसिपी स्टेप 2
मळलेल्या पीठाच्या गोळ्याची वाटी सारख्या आकाराची पारी करुन त्यात खोबर्याचे सारण भरुन चुन्या पाडत मोदक सगळ्या बाजूंनी बंद करुन घ्यावा. तसेच मोदकाच्या साच्याला आतून तूप लावून, त्यात उकडीचा एक लहानसा गोळा भरुन बोटाने साच्यात पसरवत मग त्यात सारण भरुन साच्याच्या तळाला थोडं पीठ लावून मोदक बंद करुन नंतर अलगद साचा उघडावा. छान सुंदर आणि सुबक असे मोदक तयार होतात ‌
मोदकाच्या साच्यात तळाच्या भांड्यात पाणी घालून त्याला उकळी आल्यावर मोदकाच्या जाळीच्या भांड्याला आतून तूप लावून त्यावर बनवलेले मोदक पाण्यात जरासे भिजवून ठेवावे, आणि १५ मिनिटे मध्यम गॅसवर उकडून घ्यावे. पाण्यात भिजवल्यामुळे मोदक उडताना फाटत नाहीत.
मोदक उकडताना आधी मोदकावर दुधात भिजवलेली केशर काडी लावावी, खूप सुंदर दिसते आणि वास पण छानच येतो. गरमागरम २१ मोदक इतर पदार्थांच्या बरोबर ठेवून नैवेद्य दाखवावा .
@Ujwala_rangnekar