अक्कलकोट येथे शाळेचा स्लॅब कोसळून 13 विद्यार्थी जखमी..!

सोलापूर जिल्ह्यातील अक्कलकोट तालुक्यातून एक धक्कादायक बातमी समोर आली आहे. बबलाद येथील जिल्हा परिषदेच्या कन्नड मध्यमाच्या शाळेत पोर्चमधील स्लॅबचा काही थर अचानक विद्यार्थ्यांवर कोसळला. या दुर्दैवी घटनेत १३ विद्यार्थी गंभीर जखमी झाले आहेत. सुदैवाने, सर्व जखमी विद्यार्थ्यांवर तात्काळ प्राथमिक उपचार करण्यात आले आहेत. त्यामध्ये रमेश शिवमूर्ती व भीमण्णा गवळी हे दोन शिक्षक व १३ विद्यार्थी जखमी झाले आहेत. ४ विद्यार्थ्यांच्या डोक्याला खोच पडली. तर, दोघांच्या कपाळाला खोच पडली आहे. जवळच्या प्राथमिक आरोग्य केंद्रामध्ये जखमी विद्यार्थी व शिक्षकांना उपचारासाठी दाखल करण्यात आले. सर्वांची प्रकृती स्थिर असून मलमपट्टी, औषधोपचार करून विद्यार्थ्यांना घरी सोडण्यात आल्याची माहिती, गटशिक्षणाधिकारी प्रशांत अरबाळे यांनी दिली.