केंद्रीय मंत्री प्रल्हाद जोशी यांच्या निवासस्थानासमोर आंदोलन; साखरेची एमएसपी ५० रुपये, इथेनॉलचा दर ७० रुपये करण्याची मागणी
येस न्यूज मराठी नेटवर्क: ऊसाला योग्य आणि उत्पादन खर्चाच्या तुलनेत लाभदायक दर मिळावा, यासाठी कर्नाटकासह महाराष्ट्रातील ऊस उत्पादक शेतकरी संघटनांनी मंगळवारी (२९ सप्टेंबर) हुबळी येथे मोठे आंदोलन केले. केंद्रीय अन्न व नागरी पुरवठा मंत्री प्रल्हाद जोशी यांच्या निवासस्थानासमोर तसेच राणी चन्नम्मा सर्कल परिसरात शेतकऱ्यांची मोठी गर्दी झाली. आंदोलनात महाराष्ट्रातील शेतकरी संघटनांचे नेते राजू शेट्टी आणि कर्नाटक राज्य रयत संघाचे अध्यक्ष चुन्नप्पा पुजारी यांच्यासह विविध शेतकरी नेते सहभागी झाले.
शेतकरी संघटनांनी साखरेचा किमान विक्री दर (MSP) ५० रुपये प्रतिकिलो करण्याची मागणी केली आहे. तसेच इथेनॉलच्या खरेदी दरात वाढ करून तो ७० रुपये प्रतिलिटर करण्याची मागणी करण्यात आली आहे. या मागण्यांमुळे साखर उद्योगातून निर्माण होणाऱ्या उत्पन्नात वाढ होऊन त्याचा फायदा ऊस उत्पादकांना मिळू शकतो, असा आंदोलकांचा दावा आहे.
ऊसाला ५,५०० रुपये दराचीही मागणी
कर्नाटकातील शेतकरी संघटनांनी २०२६-२७ गळीत हंगामासाठी ऊसाचा दर ५,५०० रुपये प्रतिटन निश्चित करण्याची मागणीही केली आहे. उत्पादन खर्च, मजुरी, खते, तोडणी आणि वाहतूक खर्चात झालेली वाढ लक्षात घेऊन ऊसाला योग्य दर मिळावा, अशी भूमिका आंदोलकांनी मांडली.
गळीत हंगाम लवकर सुरू करण्यास विरोध
यंदाचा गळीत हंगाम लवकर सुरू करण्याच्या निर्णयावरही शेतकरी संघटनांनी आक्षेप घेतला आहे. लवकर गाळप सुरू झाल्यास उसाच्या वजनावर आणि साखर उताऱ्यावर परिणाम होऊन शेतकऱ्यांचे आर्थिक नुकसान होऊ शकते, असा दावा राजू शेट्टी यांनी यापूर्वी केला होता. निर्णय मागे न घेतल्यास आंदोलन तीव्र करण्याचा इशाराही देण्यात आला होता. दरम्यान, केंद्रीय मंत्री प्रल्हाद जोशी यांनी शेतकरी नेत्यांना चर्चेसाठी दिल्लीला येण्याचे आवाहन केले आहे. शेतकऱ्यांच्या समस्या आणि मागण्यांवर चर्चा करण्याची तयारी असल्याचे त्यांनी म्हटले आहे.
साखर दर, इथेनॉल दर, ऊसाचा भाव आणि गळीत हंगामाच्या मुद्यांवर महाराष्ट्र-कर्नाटकातील शेतकरी संघटना आता एकत्र आल्याने या आंदोलनाकडे ऊस पट्ट्यातील शेतकऱ्यांचे लक्ष लागले आहे.
