खासदार डॉ. ज्योतीताई वाघमारे यांच्या मार्गदर्शनाखाली मंडळाची ऐतिहासिक शिस्त; पोलीस प्रशासन आणि मध्यवर्ती महामंडळाकडून कौतुकाचा वर्षाव.
सोलापूर: गणेशोत्सव विसर्जन मिरवणुकीत सर्वत्र डीजे आणि ढोल-ताशांचा कानठळ्या बसवणारा आवाज घुमत असताना, सोलापूर शहरातील लष्कर भागातील ‘जयशंकर तालीम तरुण मंडळाने’ संपूर्ण जिल्ह्यासमोर एक नवा आणि अनोखा आदर्श घालून दिला आहे. न्यायालयाने रात्री १२ नंतर वाद्य वाजवण्यास दिलेल्या बंदीच्या आदेशाचा आदर करत, या मंडळाने सोलापूरच्या इतिहासात प्रथमच ‘बिना वाद्यांचा’ थरारक लेझिम डावसादर केला. वाद्यांच्या तालाशिवाय केवळ लेझिमच्या खणखणाटावर आणि शिस्तीच्या बळावर सादर झालेला हा डाव पाहून सोलापूरकर भारावून गेले.
नेमकं काय घडलं?
शुक्रवारी विसर्जन मिरवणुकीदरम्यान जयशंकर तालीम तरुण मंडळाचे लष्कर मध्यवर्ती भागात रात्री ११:५७ वाजता आगमन झाले. स्वागत आणि इतर औपचारिकता पूर्ण होईपर्यंत रात्रीचे १२ वाजले. १२ वाजताच कोर्टाच्या नियमांनुसार वाद्य वाजवण्याची वेळ संपली होती. अनेक मंडळे अशा वेळी पोलिसांशी हुज्जत घालतात किंवा नियम पाळण्यास टाळाटाळ करतात. मात्र, जयशंकर तालीम मंडळाने कायद्याचे तंतोतंत पालन करण्याचा निर्णय घेतला. त्यांनी तात्काळ सर्व ढोल-ताशा आणि वाद्ये बंद केली. पण मिरवणुकीचा उत्साह कमी होऊ दिला नाही. वाद्यांचा एकही टिपरी न पडता, केवळ लेझिम धारकांच्या अंतर्गत ताळमेळ आणि शिस्तीच्या जोरावर त्यांनी ‘बिना वाद्यांचा लेझिम डाव’ सुरू केला. लेझिमच्या आवाजाचा तो थरार आणि शिस्त पाहून उपस्थित जनसमुदायाने टाळ्यांचा कडकडाट केला. सोलापूर जिल्ह्यात असा प्रयोग आजतागायत कोणत्याही मंडळाने केला नव्हता.
खासदार डॉ. ज्योतीताई वाघमारे यांच्या शिस्तीची शिदोरी!
या ऐतिहासिक आणि शिस्तबद्ध कामगिरीमागे मंडळाचे मार्गदर्शक आणि खासदार डॉ. ज्योतीताई वाघमारे यांची प्रेरणा असल्याचे मंडळाच्या पदाधिकाऱ्यांनी सांगितले. खासदार वाघमारे यांच्याकडून मिळालेल्या संस्कार, शिस्त आणि कायद्याच्या आदराचे पालन करत कार्यकर्त्यांनी हा अनोखा आदर्श सोलापूरकरांसमोर ठेवला.
पोलीस प्रशासन आणि मध्यवर्तीकडून कौतुक
नियम पाळत आणि पोलिसांना पूर्ण सहकार्य करत सादर केलेल्या या डावामुळे पोलीस प्रशासन तसेच लष्कर मध्यवर्ती गणेशोत्सव महामंडळाच्या पदाधिकाऱ्यांनी जयशंकर तालीम मंडळाचे भरभरून कौतुक केले. “उत्सव असाही साजरा होऊ शकतो आणि कायदा पाळूनही लोक मने जिंकू शकतात, हे या मंडळाने दाखवून दिले,” अशा शब्दांत पोलिसांनी मंडळाचा गौरव केला.
पदाधिकारी आणि कार्यकर्त्यांची मेहनत
हा ऐतिहासिक आणि शिस्तबद्ध प्रयोग यशस्वी करण्यासाठी मंडळाचे आदर्श स्तंभ कुमार जंगडेकर, लेझिम प्रमुख भिमा वाघमारे आणि मिरवणूक प्रमुख अजय जंगडेकर यांनी विशेष परिश्रम घेतले. त्यांच्याच योग्य नियोजनामुळे आणि मार्गदर्शनामुळे लेझिम पथकाने वाद्यांशिवाय देखील उत्कृष्ट समन्वय दाखवला. यासोबतच मंडळाचे अध्यक्ष, उपाध्यक्ष, खजिनदार यांसह सर्वच पदाधिकारी आणि कार्यकर्त्यांनी शिस्त राखण्यासाठी मोलाचे योगदान दिले. कार्यकर्त्यांच्या याच एकजुटीमुळे सोलापूरच्या विसर्जन मिरवणुकीत एक नवा इतिहास रचला गेला आणि सध्या संपूर्ण सोलापूर जिल्ह्यात या अनोख्या डावाची जोरदार चर्चा सुरू आहे.
