सोलापुरात 102 मेंबरसाठी 738 जणांनी दंड थोपटले ! तिरंगी- चौरंगी लढती..

सोलापूर महापालिकेच्या 102 नगरसेवकांच्या जागांसाठी 738 उमेदवारांनी एकमेकांच्या विरोधात दंड थोपटले आहेत. महापालिकेच्या सर्वच्या सर्व अशा 26 प्रभागांपैकी बहुतांश प्रभागांमध्ये तिरंगी आणि चौरंगी तर काही प्रभागात दुरंगी आणि बहुरंगी लढती रंगणार आहेत. उमेदवारी अर्ज माघार घेण्याच्या दिवशी तब्बल 492 जणांनी काल माघार घेतली. आज अपक्ष उमेदवारांना चिन्ह वाटप करून निवडणुकीच्या रिंगणातील उमेदवारांची यादी प्रसिद्ध केली जाणार आहे. सोलापुरातील आमदार विजयकुमार देशमुख आणि आमदार सुभाष देशमुख एकूण 26 जणांनी उमेदवारी न मिळाल्यामुळे बंडखोरी केली होती मात्र यातील बहुतांश जणांचे बंड शमविण्यास भाजपाला यश आले. राजू आलुरे, शितल गायकवाड, रश्मी विशाल गायकवाड, श्रीशैल हिरेमठ यांच्यासह अजून आठ जणांची बंडखोरी कायम असून हे बंडखोर आमदार विजयकुमार देशमुख तसेच आमदार सुभाष देशमुख यांचा फोटो लावून प्रचार करणार असे सांगत आहेत. एकूणच आज पासून पुढील बारा दिवस सोलापूरकरांना प्रचाराची रणधुमाळी पहावयास मिळणार आहे.